ပျားကြီး၊ ဩဂုတ် ၁၉ ရက်၊ ဆိပ်ဖြူ
မကွေးတိုင်း ဆိပ်ဖြူမြို့နယ်မှာ စစ်ကောင်စီတပ်က လေကြောင်းကနေ တိုက်ခိုက်ခဲ့တာကြောင့် ၇ ဦးထက်မနည်း သေဆုံးခဲ့တယ်လို့ ဒေသခံတွေက ပြောပါတယ်။
ဒီနေ့ ဩဂုတ် ၁၉ ရက် နေ့လယ်ပိုင်းမှာ ကျေးရွာပေါင်း ၄ ရွာထက်မနည်း တိုက်ပွဲ ဖြစ်ပွားမှုမရှိဘဲ Y12 အမျိုးအစားလေယာဉ်နဲ့ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
“အရမ်းကြီး ဆိုးရွားတယ်။ ရွာတည့်တည့်ကို ဦးတည်ပစ်သွားတာ။ သေတဲ့သူတွေရော ခြေထောက် ပြတ်သွားတဲ့သူတွေရော အများကြီးပဲ” လို့ ရှားလှရွာခံတစ်ဦးက ပြောပါတယ်။
စစ်တပ်ဟာ လေကြောင်း တိုက်ခိုက်မှုကို ပိုင်း၊ ရှားလှ၊ ဝန်ကြီး၊ ကျွန်းတောရွာတွေဘက် တဆက်တည်း လုပ်ဆောင်ခဲ့တာပဲ ဖြစ်ပါတယ်။
လေကြောင်း တိုက်ခိုက်မှုအတွင်း ရှားလှရွာက အဆိုးရွားဆုံး ခံစားခဲ့ရပြီး သေဆုံးအပြင် ၂ ဦး ပြင်းပြင်းထန်ထန် ဒဏ်ရာ ရရှိခဲ့သလို ဝန်ကြီးရွာမှာလည်း အမျိုးသမီးတစ်ဦး ထိခိုက်ဒဏ်ရာ ရရှိခဲ့တယ်လို့ ဒေသခံတွေက ပြောဆိုပါတယ်။
ဆိပ်ဖြူမြို့နယ်ရှိ ပိုင်း၊ ဝန်ကြီး၊ ရှားလှ၊ ကျွန်းတော၊ အိုင်ကြီးနဲ့ ကျွန်းချောင်းရွာတွေကို စစ်တပ်က Y12 နဲ့ ဗုံးကြဲတိုက်ခိုက်ခဲ့တယ်လို့ အညာမြေတပ်ပေါင်းစု သတင်းနဲ့ ပြန်ကြားရေးတာဝန်ခံ ကိုဘိုဘိုသန့်ဇင်ကလည်း ရွှေဖီမြေကို ပြောပါတယ်။
“လူနေအိမ် ပျက်စီးပြီး သေဆုံးမှုတွေ များပါတယ်။ ဗုံးသီးက အကြိမ်ရေ နှစ်ဆယ်ခန့်ပါ။ ထိခိုက်ဒဏ်ရာ ရတာလည်း များနေပါတယ်”
စစ်တပ်ရဲ့ ဗုံးကြဲတိုက်ခိုက်မှုကြောင့် သေဆုံးသူတွေဟာ ရှားလှရွာခံ ၄ ဦးနဲ့ ကျွန်းတောရွာခံ ၃ ဦး ဖြစ်တယ်လို့ ကိုဘိုဘိုသန့်ဇင်က ဆက်ပြောပါတယ်။
အခုလို လေကြောင်း တိုက်ခိုက်မှုကြောင့် ဒေသခံ ၆ ထောင်ကျော်ဟာ ဘေးလွတ်ရာဘက် လတ်တလော ထွက်ပြေးတိမ်းရှောင်နေရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
