ပျားကြီး၊ ဧပြီ ၁၇ ရက်၊ ဝက်လက်
စစ်ကိုင်းတိုင်း ဝက်လက်မြို့နယ် သစ်ဆိမ့်ကျေးရွာကို စစ်ကောင်စီတပ်က လေကြောင်းနဲ့ တိုက်ခိုက်ခဲ့တာကြောင့် ကလေးငယ်တစ်ဦးအပါအဝင် လူ ၄ ဦး သေဆုံးခဲ့ပြီး ထိခိုက်ဒဏ်ရာရသူ ၅ ဦး ရှိခဲ့တယ်လို့ ဒေသခံတွေက ပြောပါတယ်။
မနေ့ သင်္ကြန်အတက်နေ့ ဧပြီ ၁၆ ရက် နေ့လယ်ပိုင်းမှာ ဂျက်ဖိုက်တာနဲ့ ဗုံးသီး ကြဲချခဲ့တာဖြစ်ပြီး လူနေအိမ်လည်း ထိခိုက်ပျက်စီးခဲ့ပါတယ်။
“နေ့လယ် ၂ နာရီလောက်ဖြစ်မယ်။ ဂျက်ဖိုက်တာနဲ့ ပစ်ချသွားတာပေါ့။ အိမ်တွေထဲ ရှိနေတဲ့သူတွေ ထိကုန်တာ။ အမျိုးသမီးတွေ ထိတာများတယ်” လို့ ဒေသခံအမျိုးသားတစ်ဦးက ပြောပါတယ်။
လေကြောင်း တိုက်ခိုက်မှုကြောင့် အသက် ၆ နှစ်အရွယ် ကလေးငယ် ၁ ဦးနဲ့ အမျိုးသမီး ၂ ဦး၊ အမျိုးသား ၁ ဦး သေဆုံးခဲ့တာပဲ ဖြစ်ပါတယ်။
အလားတူ နှစ်ဆန်းတစ်ရက်နေ့ဖြစ်တဲ့ ဒီနေ့မနက်ပိုင်းမှာလည်း မန္တလေးတိုင်း မတ္တရာမြို့နယ် ထန်းပင်ကုန်းရွာကို လေကြောင်းနဲ့ တိုက်ခိုက်ခဲ့သလို ကံဖြူ၊ အောင်ချမ်းသာရွာဘက်လည်း လက်နက်ကြီးနဲ့ ၅ ကြိမ်ထက်မနည်း ပစ်ခတ်တိုက်ခိုက်ခဲ့တယ်လို့ ဒေသခံတွေက ပြောဆိုပါတယ်။
