ကံထူးမရွာဆေးရုံကို စစ်ကောင်စီက လေကြောင်းတိုက်ခိုက်၊ ပြည်သူ ၆ ဦး သေဆုံး

ပျားကြီး၊ နိုဝင်ဘာ ၂၄ ရက်၊ တန့်ဆည်

စစ်ကိုင်းတိုင်း တန့်ဆည်မြို့နယ် ကံထူးမကျေးရွာက ဆေးရုံကို စစ်ကောင်စီတပ်က လေကြောင်းတိုက်ခိုက်မှု ပြုလုပ်ခဲ့တာကြောင့် ပြည်သူ ၆ ဦးထက်မနည်း သေဆုံးခဲ့တယ်လို့ ဒေသခံတွေက ပြောပါတယ်။

ဒီနေ့ နိုဝင်ဘာလ ၂၄ ရက် မနက်အစောပိုင်း ၁ နာရီဝန်းကျင်မှာ လေကြောင်းတိုက်ခိုက်မှု ပြုလုပ်ခဲ့တာဖြစ်ပြီး ဆေးရုံအနီးမှာရှိတဲ့ ကားဘော်ဒီရုံက အလုပ်သမားတွေ အသက်ဆုံးရှုံးခဲ့ရတာ ဖြစ်ပါတယ်။

“အိပ်မောကျနေတဲ့အချိန်ဆိုတော့ လေယာဥ်လာတာ မသိလိုက်ဘူးနဲ့ တူတယ်။ အလုပ်သမားတွေ အများဆုံးသေတာပေါ့” လို့ အသက် ၅၀ အရွယ် ဒေသခံအမျိုးသားတစ်ဦးက ပြောပါတယ်။

သန်းခေါင်ယံ လေကြောင်းတိုက်ခိုက်မှုကြောင့် ဆေးရုံဝန်းအတွင်းက ဓာတ်မှန်ဆောင် ပြိုကျပျက်စီးခဲ့ပြီး အနီးအနားက နေအိမ်ဆိုင်ခန်းတွေလည်း ဗုံးထိမှန်ပျက်စီးခဲ့တယ်လို့ ဒေသခံတွေက ဆိုပါတယ်။

အဲဒီအပြင် ထိခိုက်ဒဏ်ရာရသူတွေလည်း ၁၀ ဦးဝန်းကျင်အထိ ရှိတယ်လို့ သိရပါတယ်။

ကံထူးမကျေးရွာဟာ ပြီးခဲ့တဲ့ စက်တင်ဘာလကုန်ပိုင်းကလည်း စစ်ကောင်စီရဲ့ လေကြောင်းတိုက်ခိုက်မှုကို ခံခဲ့ရပြီး အဲဒီတုန်းက ပြည်သူ ၁၁ ဦးအထိ သေဆုံးခဲ့ရပါတယ်။

~ ~ ~

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram