ပျားကြီး၊ ဧပြီ ၂၁ ရက်၊ မတ္တရာ
မန္တလေးတိုင်း မတ္တရာမြို့နယ် အနောက်ခြမ်း အိုင်ဒိုင်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဘုန်းကြီးတစ်ပါးနဲ့ လူ ၃ ဦး ထိခိုက်ဒဏ်ရာ ရရှိခဲ့တယ်လို့ ဒေသခံတွေက ပြောပါတယ်။
ဒီနေ့ နေ့လယ် ၁ နာရီဝန်းကျင်က မန္တလေးမြို့ရဲ့ အနောက်မြောက်ဖက် ၆ မိုင်ကျော်သာဝေးတဲ့ အိုင်ဒိုင်ရွာ ဘုန်းကြီးကျောင်းကို လေကြောင်းကနေ တိုက်ခိုက်ခဲ့တာပဲ ဖြစ်ပါတယ်။
“အိုင်ဒိုင်က မင်းကွန်းနဲ့ ပိုနီးတယ်။ ထိတဲ့သူတွေက အခုထိတော့ မသေသေးဘူးပေါ့။ ဒါပေမဲ့ အသက်အန္တရာယ် စိုးရိမ်ရတယ်။ ဘုန်းကြီးကျောင်း အဆောက်အဦးတွေ အများကြီး ထိတယ်” လို့ ဒေသခံ အမျိုးသားတစ်ဦးက ပြောပါတယ်။
အိုင်ဒိုင်ရွာဟာ ငလျင်ဒဏ် အများဆုံး ခံခဲ့ရတဲ့ရွာတွေထဲ ပါဝင်ပြီး လက်ရှိအချိန်ထိ ကူညီကယ်ဆယ်ရေး မရသေးတာကြောင့် စားဝတ်နေရေး ခက်ခဲမှု ရင်ဆိုင်နေရချိန်မှာအခုလို လေကြောင်း တိုက်ခိုက်မှုကို ခံခဲ့ရတာလို့ ဒေသခံတွေက ဆိုပါတယ်။
ဒါ့အပြင် ပင်ကုက္ကို ဘုန်းကြီးကျောင်းကိုလည်း ဗုံး ၂ လုံး ထပ်မံ ကြဲချခဲ့တယ်လို့ ဒေသခံတွေက ပြောပါတယ်။
မနေ့ ဧပြီ ၂၀ ရက် ညပိုင်းမှာလည်း စစ်ကိုင်း-မင်းကွန်း ကားလမ်းပေါ်က လက်ပံရွာကိုလည်း စစ်တပ်က အကြောင်းမဲ့ လက်နက်ကြီးနဲ့ ၃ ကြိမ်ထက်မနည်း ပစ်ခတ်ခဲ့ပြီး ပစ်ခတ်သံတွေကို မန္တလေးမြို့ပေါ်က လူထုတွေပါ ကြားခဲ့ရပါတယ်။
