ကောလင်းမြို့နယ် ဒိုးပင်ရွာ လေကြောင်းတိုက်ခိုက်ခံရ၊ ဒေသခံ ၄ ဦးထိခိုက်ဒဏ်ရာရ၊ ဆီဘောင်ကား ၂ စီး မီးလောင် ပြာကျ

ယာရူစိင်၊ ဇူလိုင် ၁၅ ရက်၊ ကောလင်း

စစ်ကိုင်းတိုင်း ကောလင်းမြို့နယ် ဒိုးပင်ရွာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၄ ဦးထိခိုက်ဒဏ်ရာရရှိခဲ့တယ်လို့ ဒေသခံသတင်းအရင်းအမြစ်တစ်ဦးက ရွှေဖီမြေကို ပြောပါတယ်။

မနေ့ ဇူလိုင် ၁၄ ရက် ညနေ ၄ နာရီခွဲကျော်မှာ ကောလင်းမြို့နယ် အရှေ့ခြမ်းရှိ ဒိုးပင်ရွာကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့ပါတယ်။

ဒေသခံ တစ်ဦးက”ထမင်းဆိုင်နဲ့ ဆီဆိုင်တွဲဖွင့်ထားတာ။ ဆီဘောင်ကား ၂ စီးလည်း ဗုံးကြဲတဲ့ အနီးအနားမှာဆိုတော့ မီးလောင်သွားတာပေါ့။ ဒဏ်ရာရတဲ့ ၄ ဦးထဲက ၁ ဦးတော့ ပိုပြင်းထန်တာပေါ့။ ဒဏ်ရာရတာက ကလေးငယ်တစ်ယောက်လည်း ပါတယ်”လို့ ပြောပါတယ်။

စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် ဒေသခံ အမျိုးသား ၂ ဦး၊ အမျိုးသမီး ၁ဦးနဲ့ ကလေးငယ် ၁ ဦး ထိခိုက်ဒဏ်ရာရရှိခဲ့ပြီး ဆီဘောင်ဆာကား ၂ စီးနဲ့ ဆိုင်တချို့လည်း ပျက်စီးခဲ့တယ်လို့ ဆိုပါတယ်။

ပြီးခဲ့တဲ့ ဇွန်လ ၉ ရက်ကလည်း ကောလင်းမြို့နယ် ဖလဲရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ဒေသခံ ၃ ဦးဒဏ်ရာရရှိခဲ့ပါတယ်။

ဒါ့အပြင် ပြီးခဲ့တဲ့ ဧပြီ ၉ ရက်ကလည်း ကောလင်းခရိုင် ဝန်းသိုမြို့နယ် နန့်ခမ်းကျေးရွာ ဆေးရုံအနီးကို စစ်တပ်က လေကြောင်းကနေ တိုက်ခိုက်တာကြောင့် ဒေသခံ ၂၀ ကျော်သေဆုံးပြီး ၅၀ ဝန်းကျင်ဒဏ်ရာရရှိခဲ့ပါတယ်။

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram