အင်းငယ်၊ ဖေဖော်ဝါရီ ၅ ရက်၊ ပုသိမ်
ဧရာဝတီတိုင်း ပုသိမ်မြို့က အကျဉ်းထောင်ကို စစ်ကောင်စီက လုံခြုံရေး တင်းကြပ်ထားပြီး လူ့အခွင့်အရေး ချိုးဖောက်မှု လုပ်ဆောင်နေတယ်လို့ ထောင်နဲ့ နီးစပ်သူတွေက ရွှေဖီမြေကို ပြောပါတယ်။
ဧရာဝတီတိုင်းအထိ စစ်မီး ကူးစက်လာပြီးတဲ့နောက်ပိုင်း သာပေါင်းမြို့ကနေ ပုသိမ်မြို့နယ် မန်ကျီးဇင်ရွာကို လာရောက်တဲ့ လမ်းတစ်လျှောက်မှာ တိုက်ပွဲ ဖြစ်ပွားနေတာကြောင့် စစ်တပ်က စိုးရိမ်မှုနဲ့အတူ အကျဉ်းထောင်ကို ပိုပြီးတင်းကြပ်လာတာပါ။
မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ယက်- PPNM ရဲ့ ရုံးတာဝန်ခံ ဆရာမလင်းက “ဒီလို အခြေအနေသာ အမြဲတမ်း ဆက်တိုက် ဖြစ်နေမယ်ဆိုလို့ရှိရင်တော့ အာဟာရ ချို့တာ၊ ကျန်းမာရေးထိခိုက်တာလည်း ဖြစ်နိုင်တယ်။ တချို့ မပြေလည်တဲ့သူတွေအနေနဲ့ ဝယ်မစားနိုင်ဘူးပေါ့နော် ပါဆယ်လည်း မပို့နိုင်ဘူး ထောင်က အစားအစာလည်း မစားနိုင်ဘူး ဆိုလို့ရှိရင်တော့ ကျန်းမာရေးပါ ထိခိုက်လာနိုင်ပါတယ်” လို့ ပြောပါတယ်။
လက်ရှိ ပုသိမ်ထောင်ဝင်စာမှာ ဟင်း ၃ မျိုး၊ ကော်ဖီမစ် ၃ ထုပ်သာ ခွင့်ပြုထားပြီး စာအုပ်နဲ့ ဆေးဝါးကိုတော့ လုံးဝ ပိတ်ပင်ထားတယ်လို့ ထောင်နဲ့ နီးစပ်သူတွေက ဆိုပါတယ်။
ဒါ့အပြင် သုံးရေတွေကိုလည်း ခဲဓာတ် ဖြည့်ထားတာကြောင့် သက်ကြီးပိုင်း နိုင်ငံရေးအကျဉ်းသားအနေနဲ့ ခဲဆိပ်သင့်ပြီး လမ်းမလျှောက်နိုင်တာ၊ မလှုပ်ရှားနိုင်တာတွေ ဖြစ်ပေါ်နေတယ်လို့ သိရပါတယ်။
PPNM ဦးဆောင်ကော်မတီဝင် ကိုသိုက်ထွန်းဦးက “ဒါကတော့ အကျဉ်းထောင် အသီးသမီးမှာကိုမှ တခြားရာဇဝတ်အကျဉ်းသားတွေထက် နိုင်ကျဉ်းတွေက ဖိနှိပ်မှု ပိုပြီးခံရတဲ့ အခြေအနေပါ။ ပိုပြီးဆိုးတာက ပုသိမ်ထောင်မှာ အာဏာသိမ်းပြီးနောက်ပိုင်းမှာပဲ ဆန္ဒပြတဲ့ နိုင်ကျဉ်းတွေကို ပစ်ခတ်မှုဖြစ်ခဲ့လို့ ကျဆုံးတဲ့ ရဲဘော်တွေလည်းရှိတော့ ပိုပြီး ဖိနှိပ်တာပေါ့” လို့ ပြောပါတယ်။
လက်ရှိ ပုသိမ်ထောင်ရဲ့ တွေ့ကြုံနေတဲ့ မြေပြင်လမ်းကြောင်း အခြေအနေအရ ကူညီမယ့်သူအနေနဲ့ အခက်အခဲ ရှိနိုင်တာကြောင့် သတင်းအချက်အလက် စောင့်ကြည့်ပြီး ဝေမျှပေးကြဖို့ နိုင်ကျဉ်းဟောင်းတွေက တောင်းဆိုSpamပါတယ်။
