မြတ်နိုး၊ ဇန်နဝါရီ ၁၁ ရက်၊ မြစ်ကြီးနား
စစ်ကောင်စီခေါင်းဆောင် ဗိုလ်မှူးကြီး မင်းအောင်လှိုင်ဟာ KIA နဲ့ ပူးပေါင်းတပ်ဖွဲ့က ကချင်ပြည်နယ်ရှိ နေရာအများစုကို သိမ်းပိုက်ပြီးနောက် သဘာဝ သယံဇာတကို မျှတစွာ ခွဲဝေအသုံးချဖို့ မူဘောင် ချမှတ်ဖို့လိုကြောင်း မနေ့ ဇန်နဝါရီ ၁၀ ရက်မှာ ကျရောက်တဲ့ ၇၇ နှစ်မြောက် ကချင်ပြည်နယ်နေ့အတွက် ပေးပို့တဲ့ သဝဏ်လွှာမှာ ပြောဆိုထားပါတယ်။
သဘာဝ သယံဇာတ ရင်းမြစ်တွေကို ရေရှည်ထိန်းသိမ်းပြီး မျှတမှန်ကန်စွာ ခွဲဝေ အသုံးချနိုင်မယ့် စီးပွားေရးမူဘောင်တွေ ချမှတ်ဆောင်ရွက်ဖို့ လိုကြောင်း အဲဒီသဝဏ်လွှာမှာ ထည့်သွင်းဖော်ပြထားပါတယ်။
ကချင်ပြည်နယ်မှာ တန်ဖိုးမဖြတ်နိုင်တဲ့ အဖိုးတန်ရတနာတွေ ပေါကြွယ်ဝပြီး သဘာဝ အရင်းအမြစ်တွေ ထွက်ရှိရာ ပြည်နယ်ဖြစ်ပြီးတော့ သဘာဝ သယံဇာတ အရင်းအမြစ်ကို ရေရှည် ထိန်းသိမ်းနိုင်မယ့် မူဘောင် ချမှတ်ကာ အလေးထား လုပ်ဆောင်ကြဖို့လည်း ပြောဆိုထားပါတယ်။
ဒါ့အပြင် လက်ရှိမှာ စစ်ကောင်စီက နိုင်ငံရဲ့ နိုင်ငံေရး၊ စီးပွားရေး၊ လူမှုရေးကဏ္ဍပေါင်းစုံ ဆောင်ရွက်နေတဲ့ကာလဖြစ်ကြောင်း၊ ဒီမိုကေရစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စု တည်ဆောက်နိုင်ရေး၊ တစ်နိုင်ငံလုံး ထာဝရငြိမ်းချမ်းရေး ရရှိစေရေးအတွက် တို့တာဝန် အရေးသုံးပါးနဲ့အညီ ကာကွယ်စောင့်ရှောက်လျက်ရှိကြောင်း ပြောပါတယ်။
ဒါပေမဲ့ လတ်တလော ကချင်ပြည်နယ်က တိုက်ပွဲ ဖြစ်ပွားတဲ့ ဗန်းမော်၊ မံစီအပြင် တိုက်ပွဲ ဖြစ်ပွားခြင်း မရှိတော့တဲ့နေရာကိုလည်း လေကြောင်းနဲ့ မကြာခဏ ဗုံးကြဲ တိုက်ခိုက်ခဲ့တယ်လို့ ဒေသခံတွေက ပြောပါတယ်။
အရင်က ကချင်ပြည်နယ်နေ့ကို ကချင်စာပေနဲ့ ရိုးရာယဉ်ကျေးမှုအဖွဲ့က ဦးဆောင်ပြီး ကချင်ပြည်နယ်နေ့ကို ဂုဏ်ပြုတဲ့အနေနဲ့ မနောအက ဆင်နွှဲခဲ့ပေမဲ့ စစ်အာဏာ သိမ်းပြီးနောက် စစ်ကောင်စီက ဦးဆောင်ပြုလုပ်လာပြီး ဒီနှစ်မှာ စစ်ကောင်စီ ဖိတ်ခေါ်ထားတဲ့သူ၊ ဖိအားပေး ခေါ်ထားတဲ့ ဌာနဆိုင်ရာဝန်ထမ်းတွေသာ မနောအက ကကြတာကို တွေ့ရတယ်လို့ ဆိုပါတယ်။
မြန်မာနိုင်ငံ လွတ်လပ်ရေး ရရှိပြီးနောက် ကချင်ပြည်နယ်ကောင်စီ ညီလာခံရဲ့ ပထမဆုံး ညီလာခံ အစည်းအဝေး ကျင်းပခဲ့တဲ့ ၁၉၄၈ ဇန်နဝါရီ ၁၀ ရက်ကို ဂုဏ်ပြုတဲ့အနေနဲ့ ဇန်နဝါရီ ၁၀ ရက်ကို ကချင်ပြည်နယ်နေ့အဖြစ် သတ်မှတ်ဂုဏ်ပြုခဲ့တာ ဖြစ်ပါတယ်။
