မိုင်းပန်ပျော်၊ ဇန်နဝါရီ ၁၆ ရက်၊ တန့်ယန်း
စစ်ကောင်စီ ထိန်းချုပ်ထားတဲ့ ရှမ်းမြောက် တန့်ယန်းမြို့မှာ အွန်လိုင်း ငွေလိမ်ဂိုဏ်းတွေကြောင့် အိမ်ငှားခ သိန်း ဆယ်ချီအထိ တက်လာနေတယ်လို့ ဒေသခံတွေက ရွှေဖီမြေသို့ ပြောပါတယ်။
အရင်က တန့်ယန်းမှာ တစ်လကို အိမ်တစ်အိမ် ငှားခ ၁ သိန်းကနေ ၄ သိန်းအထိသာရှိပြီး ပြီးခဲ့တဲ့ ၂၀၂၄ စက်တင်ဘာလ နောက်ပိုင်းမှာ “ဝ”ဒေသ ပန်ဆန်းမြို့ကနေ ပြောင်းရွှေ့လာတဲ့ ကျားဖြန့် လုပ်ကိုင်သူတွေ ရောက်လာတာကြောင့် အခုလို ဈေးတက်လာတာလို့ ဒေသခံ အမျိုးသားတစ်ဦးက ပြောပါတယ်။
“တရုတ်နဲ့ စစ်ရှောင်တွေဘဲ ငှားကြတာပါ။ “ဝ”ပြည်နယ် ပန်ဆန်းမှာ “ဝ”နဲ့ တရုတ်ရဲ ပေါင်းပြီး ကျားဖြန့်တွေကို လိုက်ဖမ်းတော့ တန့်ယန်းဘက်ကို ပြေးလာတာ အိမ်ငှားခ ဈေးကြီးတာက ပန်ဆန်းဘက်က တရုတ်နဲ့ စစ်ရှောင်တွေ ငှားကြလို့ ဈေးကြီးတာ”
လက်ရှိ တန့်ယန်းမှာ အိမ်ငှားခဟာ ၅ သိန်းကနေ ၁၅ သိန်းအထိ ပေးနေရပြီး ၁၀ ပေ၊ ပေ ၂၀ သာရှိတဲ့ အခန်းတွေကလည်း ၃ သိန်းအထက် ရှိတယ်လို့ ၎င်းက ဆက်ပြောပါတယ်။
တစ်လကို ဝင်ငွေ ၃ သိန်းသာရတဲ့ အခြေခံ လူတန်းစားအတွက်ကတော့ အခုလို အိမ်ငှားခက ဈေးမြှင့်တက်လာတာဟာ စားဝတ်နေရေးအတွက် အခက်အခဲ ကြုံတွေ့စေတယ်လို့ ၎င်းအမျိုးသားက ပြောပါတယ်။
ဒေသတွင်း အလုပ်အကိုင် ရှားပါးမှုနဲ့ အဆမတန် မြှင့်တက်နေတဲ့ ကုန်ဈေးနှုန်းဒဏ်တွေကြား အိမ်ငှားခဈေးနှုန်း ပြန်ကျဖို့အတွက် ဒေသခံတွေက မျှော်လင့်နေကြပါတယ်။
