ယာရူစိင်၊ မေလ ၃ ရက်၊ မိုးကုတ်
တအာင်းတပ်မတော်-TNLA နဲ့ စစ်ကောင်စီတပ်တို့ ဆွေးနွေးပွဲပျက်ပြီးနောက် စစ်ကောင်စီတပ်က TNLA ထိန်းချုပ်ထားတဲ့ မိုးကုတ်မြို့ အနောက်ပိုင်းနဲ့ နောင်ချိုမြို့တွေကို ဗုံးဆက်တိုက်ကြဲနေပါတယ်။
ဒီနေ့ မေလ ၃ ရက် မနက် ၉ နာရီအချိန်မှာ ဂျက်ဖိုက်တာနဲ့ မိုးကုတ်မြို့ အနောက်ပိုင်းကို ဗုံးကြဲတိုက်ခိုက်ခဲ့လို့ ဒေသခံ အမျိုးသားတစ်ဦး သေဆုံးခဲ့တယ်လို့ ဒေသခံတစ်ဦးက ဆိုပါတယ်။
“မနေ့လဲ ကြဲတယ်။ ဒီနေ့ မနက်လဲ ကြဲသွားတယ်။ အမျိုးသားတစ်ဦး ခေါင်းပြတ်သွားတယ်။ ပန်းရံဆရာလို့ပြောတယ်။ ဒဏ်ရာရတာလည်း ရှိတယ်”လို့ မိုးကုတ်မြို့ခံ တစ်ဦးက ရွှေဖီမြေကို ပြောပါတယ်။
မနေ့ မေလ ၂ ရက် ညနေပိုင်းအချိန်မှာလဲ မိုးကုတ်မြို့အရှေ့ပိုင်းနဲ့ အနောက်ပိုင်းကို ဗုံးကြဲတိုက်ခိုက်ခဲ့လို့ ထိခိုက်မှုမရှိပေမဲ့ နေအိမ်တချို့တော့ ထိခိုက်ပျက်စီးခဲ့ပါတယ်။
ဒီနေ့ မနက်အထိ ရွှေဖီမြေက ရရှိထားတဲ့ စာရင်းအရ မိုးကုတ်မှာ ဗုံးကြဲလို့ သေဆုံးသူ အနည်းဆုံး ၁ ဦးနဲ့ ဒဏ်ရာရသူ ၃ ဦးရှိပြီး အသေးစိတ်ကို ရွှေဖီမြေက ဆက်လက်စုံစမ်းနေဆဲ ဖြစ်ပါတယ်။
မနေ့ ညနေပိုင်းမှာလည်း TNLA ထိန်းချုပ်ထားတဲ့ နောင်ချိုမြို့နယ် လုံဝယ်ရွာထဲကို စစ်ကောင်စီတပ်က ဗုံးကြဲတိုက်ခိုက်ခဲ့ပြီး ထိခိုက်မှုတော့ မရှိခဲ့ပါဘူး။
တရုတ်ရဲ့ ကြားဝင်စေ့စပ်မှုကြောင့် ဧပြီ ၂၈ နဲ့ ၂၉ ရက်မှာ စစ်ကောင်စီနဲ့ TNLA တို့ တရုတ်နိုင်ငံ ကူမင်းမြို့မှာ တွေ့ဆုံခဲ့ပါတယ်။
ဆွေးနွေးပွဲမှာ စစ်ကောင်စီတပ်က လက်ရှိ TNLA ထိန်းချုပ်ထားတဲ့ နောင်ချို၊ ကျောက်မဲ၊ သီပေါ၊ မိုးကုတ်၊ မိုးမိတ်ကနေ ပလောင်ကိုယ်ပိုင်အုပ်ချုပ်ခွင့်ရဒေသ နမ့်ဆန်မြို့နယ်နဲ့ မန်တုံမြို့နယ် အတွင်းသို့ ပြန်လည်ဆုတ်ခွါပေးဖို့ တောင်းဆိုခဲ့တာကြောင့် ဆွေးနွေးပွဲ မအောင်မြင်ဘဲ ပြီးဆုံးသွားပါတယ်။
