ပျားကြီး၊ ဖေဖော်ဝါရီ ၁၈ ရက်၊ ကနီ
စစ်ကိုင်းတိုင်း ကနီမြို့နယ် မုဌော (အရှေ့)ရွာကို စစ်ကောင်စီတပ်က ဗုံးကြဲတိုက်ခိုက်ခဲ့တာကြောင့် ဒေသခံ သံဃာတော် ၁ ပါးနဲ့ အမျိုးသမီး ၁ ဦးထိခိုက်ဒဏ်ရာ ရရှိခဲ့တယ်လို့ ဒေသခံတွေက ပြောပါတယ်။
မနေ့ ဖေဖော်ဝါရီ ၁၇ ရက် နေ့လယ်ပိုင်းနဲ့ ညနေပိုင်းမှာ မုဌော(အရှေ့)ရွာအနီးက ချင်းတွင်းမြစ် ဆိပ်ကမ်းကို ဗုံးကြဲတိုက်ခိုက်ခဲ့တာ ဖြစ်ပါတယ်။
“လေယာဥ် လာနေပြီဆိုတာနဲ့ အမြန်ရှောင်နေတဲ့ကြားက ထိကုန်တာပေါ့။ ဒီဇယ် သယ်နေတဲ့အချိန်ဆိုတော့ ဘောက်ဆာကားတွေပါ မီးလောင်ကုန်တာ” လို့ ဒေသခံတစ်ဦးက ပြောပါတယ်။
နေ့လယ်ပိုင်း လေကြောင်း တိုက်ခိုက်မှုကြောင့် ဒီဇယ်ဆီ ဘောက်ဆာကား ၂ စီးနဲ့ ဆိုင်ကယ် ၁၁ စီး မီးလောင်ပျက်စီးခဲ့ပြီး ညနေပိုင်း တိုက်ခိုက်မှုမှာတော့ အထိအခိုက် မရှိဘူးလို့ ဒေသခံတွေက ပြောဆိုပါတယ်။
စစ်ကောင်စီဟာ စစ်ကိုင်းတိုင်းအတွင်းက မြို့နယ်အားလုံးနီးပါးကို စက်သုံးဆီသယ်ယူရောင်းချခွင့် ပိတ်ပင်ထားတာကြောင့် ဒေသတွင်း စက်သုံးဆီ ရှားပါးပြတ်လပ်မှုနဲ့ ရင်ဆိုင်နေရတာကြောင့် ဒေသခံတွေဟာ စက်သုံးဆီ ရရှိရေးအတွက် နည်းလမ်းပေါင်းစုံနဲ့ သယ်ယူနေရချိန် အခုလို ဗုံးကြဲတိုက်ခိုက်မှု ခံခဲ့ရတာ ဖြစ်ပါတယ်။
ကနီမြို့နယ်ထဲ စစ်ကောင်စီရဲ့ စက်တပ်လေထီး(Paramoter)အပါအဝင် လေကြောင်း တိုက်ခိုက်မှုကြောင့် ဖေဖော်ဝါရီလအတွင်း ထောက်ကြံ့ကုန်း၊ ဆူးလေကုန်း၊ နတ်ကြီး၊ နတ်လာပို့၊ မုဌော စတဲ့ကျေးရွာခံ ၁၀ ဦးထက်မနည်း သေဆုံးခဲ့ပြီး ဒဏ်ရာရသူ ၂၀ ဦးဝန်းကျင် ရှိခဲ့တယ်လို့ဒေသခံတွေက ပြောဆိုပါတယ်။
