ရွှေဖီမြေ၊ ဇန်နဝါရီ ၂၁ ရက်၊ အမ်း
ရခိုင်ပြည်နယ်နဲ့ မကွေးတိုင်းသို့ ချိတ်ဆက်ထားတဲ့ အမ်း-ပဒါန်းလမ်း တိုက်ပွဲအတွင်း သိမ်းဆည်းမိတဲ့ စစ်ကောင်စီတပ်ရဲ့ လက်နက်ခဲယမ်းတချို့နဲ့ စစ်သုံ့ပန်းတချို့ကို အာရက္ခတပ်တော်- AA က မနေ့ ဇန်နဝါရီ ၂၀ ရက် ညမှာ ပုံနဲ့တကွ ထုတ်ပြန်လာပါတယ်။
ပြီးခဲ့တဲ့ ဇန်နဝါရီ ၁၁ ရက်က အမ်း-ပဒါန်း လမ်းမကြီးအနီး အမ်းမြို့နယ်ထဲက ကမြင်းကန် (ကံမြင်ကန်)၊ ပိန်းရေစမ်း၊ ကြက်ရေစမ်းရွာအနီးဝန်းကျင်မှာ စစ်ကောင်စီရဲ့ တပ်မ (၈၈)၊ (၉၉) လက်အောက်ခံတပ်ရင်း၊ မကွေးတိုင်း ကာကွယ်ရေး ပစ္စည်းစက်ရုံ (ကပစ)တပ်ဖွဲ့ဝင်နဲ့ AA တို့အကြား တိုက်ပွဲဖြစ်ခဲ့တာလို့ ဆိုပါတယ်။
စစ်တပ်ဘက်က အကြိမ်ကြိမ် ထိုးစစ်ဆင် တိုက်ခိုက်ခဲ့ပေမဲ့ အထိအခိုက် အကျအဆုံးနဲ့သာ ပြန်လည်ဆုတ်ခွာ ထွက်ပြေးခဲ့ရပြီး တစ်ပတ်ကျော်ကြာ တိုက်ပွဲအတွင်း စစ်သား အလောင်းနဲ့ လက်နက်ခဲယမ်း၊ စစ်အသုံးအဆောင်ပစ္စည်းတွေကို သိမ်းဆည်းရမိခဲ့သလို စစ်သုံ့ပန်းတချို့ကိုလည်း ဖမ်းဆီးရမိခဲ့တယ်လို့ ထုတ်ပြန်ထားပါတယ်။
ရက္ခိုင်-ဧရာဝတီတိုင်းအစပ်ရဲ့ နေရာတချို့၊ ပွိုင့် (၃၆၉)ကုန်းနဲ့ ဧရာဝတီတိုင်း ရေကြည်မြို့ ချင်းစုရွာအနီးမှာလည်း တိုက်ပွဲ ဆက်လက် ဖြစ်ပွားနေတယ်လို့ ထုတ်ပြန်ချက်မှာ ဖော်ပြထားပါတယ်။
စစ်တွေ၊ ကျောက်ဖြူ၊ မာန်အောင်မြို့ထဲကနေ စစ်တွေမြို့အနီးတစ်ဝိုက် စစ်တပ်က လက်နက်ကြီး၊ လက်နက်ငယ်၊ ဒရုန်း၊ စနိုက်ဘာနဲ့ တောက်လျှောက် ပစ်ခတ်တိုက်ခိုက်နေသလို လေကြောင်း၊ ရေကြောင်းကနေလည်း နေ့စဉ်နဲ့အမျှ ရမ်းသမ်းပစ်ခတ် တိုက်ခိုက်တာ ရှိနေတယ်လို့ ဆိုပါတယ်။
ပြီးခဲ့တဲ့ ဇန်နဝါရီ ၂၀ ရက် နေ့လယ် ၁ နာရီဝန်းကျင်မှာလည်း စစ်တပ်က စစ်တွေမြို့နယ် ကံ့ကော်ကျွန်းရွာကနေ တစ်ဖက်ကမ်းရှိ ဝါဘိုရွာကို ဒရုန်းနဲ့ ဗုံးကြဲ တိုက်ခိုက်ခဲ့လို့ ဝါဘိုရွာက လူနေအိမ်တချို့ မီးလောင်ပျက်စီးခဲ့ပါတယ်။
