အိုက်ပွီး၊ မေလ ၁၉ ရက်၊ ဘူးသီးတောင်
ရခိုင်ပြည်နယ် ဘူးသီးတောင် မြို့သိမ်းတိုက်ပွဲမှာ ဖမ်းဆီးရမိတဲ့ စစ်သုံ့ပန်းနဲ့ မိသားစုဝင် ၃၀၀ ကျော်ကို အာရက္ခတပ်တော်- AA က မနေ့ မေလ ၁၈ ရက် နေ့လယ်မှာ ပြန်လွှတ်ပေးလိုက်တယ်လို့ ဒေသခံတွေက ရွှေဖီမြေသို့ ပြောပါတယ်။
ဘူးသီးတောင်မြို့ကို ထိုးစစ်ဆင် တိုက်ခိုက်သိမ်းပိုက်ရရှိတာ တစ်နှစ်ပြည့်တဲ့ မနေ့ မေလ ၁၈ ရက်မှာ AA က စစ်သုံ့ပန်းနဲ့ မိသားစုဝင်တွေကို ပြန်လွှတ်ပေးလိုက်တာပဲ ဖြစ်ပါတယ်။
“မနေ့က အခမ်းအနား ကျင်းပပြီး စစ်သုံ့ပန်းနဲ့ မိသားစုဝင်တွေကို ပြန်လွှတ်ပေးတာပါ” လို့ ဘူးသီးတောင်မြို့နယ် ဒေသခံတစ်ဦးက ရွှေဖီမြေသို့ ပြောပါတယ်။
အဲဒီစစ်သုံ့ပန်းတွေဟာ ဘူးသီးတောင်မြို့အခြေစိုက် စစ်ကောင်စီရဲ့ စကခ ၁၅ နဲ့ ခမရ ၅၅၁ စခန်းသိမ်းတိုက်ပွဲကနေ ဖမ်းဆီးရမိတဲ့ စစ်သုံ့ပန်းတွေ ဖြစ်ပါတယ်။
ပြန်လွှတ်ပေးတဲ့ စစ်သုံ့ပန်းတွေဟာ ဘူးသီးတောင်မြို့နယ်ဇာတိနဲ့ ရခိုင်ပြည်နယ်အတွင်းက ရခိုင်၊ မြို၊ ခမီး၊ ဒိုက်နက် စတဲ့လူမျိုးတွေ ဖြစ်ပါတယ်။
“အကုန်လုံးက ရခိုင်ပြည်နယ်က လူမျိုးတွေပါ။ ဘူးသီးတောင်မြို့နယ်ကဆိုရင် မိသားစုဝင်တွေက လာခေါ်ကြပါတယ်။ ဗမာတွေတော့ မပါသေးဘူး။ ကလေးတွေ၊ အမျိုးသမီးတွေ များတယ်” လို့ ဘူးသီးတောင်မြို့နယ်မှ နောက်ထပ် ဒေသခံတစ်ဦးက ရွှေဖီမြေသို့ ပြောပါတယ်။
နေရပ်ပြန်ဖို့အတွက် အဆင်ပြေတဲ့မြို့နယ်က စစ်သုံ့ပန်းတွေကို ဦးစားပေး လွှတ်ပေးတာဖြစ်တယ်လို့ AA နဲ့ နီးစပ်သူတွေဆီက သိရပါတယ်။
“ပြည်မဘက်က လူတွေဆို နေရပ်ပြန်ဖို့ အဆင်မပြေဘူး။ တစ်ဖက်မှာလည်း စကစက ရှိနေသေးတယ်။ အဲဒါကြောင့် သူတို့ကို ပြန်မလွှတ်ပေးသေးတာပါ။ ကိုယ့်ရခိုင်ဘက်ကဆို AA က ထိန်းချုပ်ထားတဲ့အတွက် ပြန်ဖို့ အခက်အခဲ မရှိဘူး။ အဆင်ပြေကြတယ်” ဆိုပြီး AA နဲ့ နီးစပ်သူတစ်ဦးက ရွှေဖီမြေသို့ ပြောပါတယ်။
လက်ရှိမှာလည်း ဘူးသီးတောင်မြို့နယ်မှာ AA ဖမ်းဆီးထားတဲ့ စစ်သုံ့ပန်း ရာနဲ့ချီ ရှိနေသေးပြီး ၎င်းတို့ကို စစ်သုံ့ပန်းဥပဒေနဲ့အညီ ထိန်းသိမ်းစောင့်ရှောက်ထားတယ်လို့ သူက ဆိုပါတယ်။
ပြီးခဲ့တဲ့ မေလ ၁၆ ရက်ကလည်း မင်းပြားမြို့သိမ်းတိုက်ပွဲအတွင်း ဖမ်းဆီးရမိတဲ့ စစ်သုံ့ပန်း ၂၂၅ ဦးကို AA က ပြန်လွှတ်ပေးလိုက်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
