ခိုင်လေး၊ ဇန်နဝါရီ ၂၄ ရက်
စစ်စည်းကမ်း ချိုးဖောက်ပြီးတော့ စစ်သုံ့ပန်း ၂ ဦးကို သတ်ဖြတ်ခဲ့တဲ့ တပ်ဖွဲ့ဝင်ကို အရေးယူထားတယ်လို့ အာရက္ခတပ်တော်- AA က ပြောပါတယ်။
ပြီးခဲ့တဲ့ ၂၀၂၄ ဖေဖော်ဝါရီ ၇ ရက်မှာ ဖြစ်ပွားခဲ့တာဖြစ်ပြီး ကျောက်တောမြို့ထဲက စကခ ၉ ဌာနချုပ်ကို AA က ထိုးစစ်ဆင် တိုက်ခိုက်ခဲ့ချိန်မှာ ဖမ်းဆီးရမိတဲ့ စစ်သုံ့ပန်း ဖြစ်တယ်လို့ AA ရဲ့ ပြောရေးဆိုခွင့်ရှိသူ ဦးခိုင်သုခက ရွှေဖီမြေကို ပြောပါတယ်။
“စစ်စည်းကမ်း ချိုးဖောက်ပြီးမှ ပြစ်မှု ကျူးလွန်တာ။ ဘာကြောင့်လဲဆိုရင် တစ်ချိန်တုန်းက သူတို့ရဲ့ မိသားစုတွေကို မတရား ဖမ်းဆီးသတ်ဖြတ်ထားတဲ့ အကြမ်းဖက် စစ်သားတွေကို သူတို့ဖမ်းမိတဲ့အချိန်မှာ ကျနော်တို့ရဲ့ ဒေသခံ ပြည်သူ့စစ်တွေက ဒေါသ မထိန်းနိုင်ဘဲနဲ့ အခုလိုမျိုး လက်စားချေတဲ့ပုံစံမျိုးနဲ့ စစ်စည်းကမ်း ချိုးဖောက်တာ ပြစ်မှုကျူးလွန်ခဲ့တာ ဖြစ်ပါတယ်”
ဖြစ်စဉ်မှာ ပါဝင်ခဲ့တဲ့ တပ်မှူးအပါအဝင် ပါဝင်သူအားလုံးကို AA က ဖော်ထုတ်ပြီး အပြစ်ပေး အရေးယူထားတယ်လို့ ဦးခိုင်သုခက ဆက်ပြောပါတယ်။
စစ်သည်တော်ကျင့်ဝတ်၊ လူ့အခွင့်အရေးကျင့်ဝတ်ကို လိုက်နာဖို့အတွက် သင်တန်းမှာကတည်းက စနစ်တကျ ပို့ချထားတာရှိပြီး စစ်မြေပြင်မှာလည်း လိုက်နာလုပ်ဆောင်ဖို့အတွက် အတိအကျ ညွှန်ကြားထားကာ အကောင်းဆုံး လိုက်နာဆောင်ရွက်လျက်ရှိကြောင်း ပြောပါတယ်။
လက်ရှိ ဖြစ်ရပ်တစ်ခုတည်းကိုသာကြည့်ပြီး ရာထောင်ချီတဲ့ စစ်သုံ့ပန်းကို ဆေးဝါး ကုသပေးပြီး ကောင်းကောင်းမွန်မွန် ကျွေးမွေးစောင့်ရှောက်ထားတာကို မမေ့ဖို့နဲ့ မြင်အောင် ကြည့်ဖို့လည်း လိုအပ်ကြောင်းနဲ့ AA က ဥပဒေမဲ့ သတ်ဖြတ်မှုမျိုးကို လုံးဝ လက်မခံတဲ့အပြင် ကျူးလွန်သူတွေကိုလည်း အပြစ်ပေး အရေးယူသွားမှာဖြစ်ပြီး အခုလိုကိစ္စမျိုး မဖြစ်အောင် အကောင်းဆုံး ထိန်းကျောင်းပြီးတော့ တိုက်ပွဲဝင်သွားမှာဖြစ်တယ်လို့ ဆိုပါတယ်။
ဖမ်းဆီးရမိတဲ့ စစ်သုံ့ပန်းနှစ်ဦးကို သတ်ဖြတ်ခဲ့တဲ့အပေါ် နိုင်ငံတကာ ရာဇဝတ်ခုံရုံး- ICC အနေနဲ့ ရခိုင်ပြည်နယ်အတွင်းရှိ ရက္ခိုင့်တပ်တော်က ကျူးလွန်ခဲ့တဲ့ စစ်ရာဇဝတ်မှုကို စုံစမ်းစစ်ဆေးသင့်ကြောင်း Fortify Rights အဖွဲ့က မနေ့ ဇန်နဝါရီ ၂၃ ရက်မှာ ထုတ်ပြန်ခဲ့ပါတယ်။
