ယာရူစိင်၊ မတ်လ ၃ ရက်၊ မိုးဗြဲ
ရှမ်းတောင်နဲ့ ကရင်နီနယ်စပ် မိုးဗြဲမြို့မှာ စစ်ကောင်စီတပ်ရဲ့ ပစ်ခတ်လိုက်တဲ့ လက်နက်ကြီးကြောင့် အမျိုးသမီးငယ် ၁ ဦးသေဆုံးပြီးကလေးငယ်အပါအဝင် ၄ ဦးဒဏ်ရာ ရရှိခဲ့တယ်လို့ သိရပါတယ်။
ပြီးခဲ့တဲ့ မတ်လ ၁ ရက် ညနေပိုင်းအချိန်မှာ စစ်တပ်ရဲ့ လက်နက်ကြီးကြောင့် မိုးဗြဲမြို့အထွက် တောင်ယာတဲထဲမှာ အသက် ၁၆ နှစ်အရွယ် အမျိုးသမီး သေဆုံးပြီး ၄ ဦး ဒဏ်ရာရရှိခဲ့တယ်လို့ မြေပြင်အခြေအနေ သိရှိသူ တစ်ဦးက ရွှေဖီမြေကို ပြောပါတယ်။
“စစ်တပ်က ပစ်တဲ့ လက်နက်ကြောင့် မသေသင့်တဲ့ ကလေးမ အသက်ဆုံးရှုံးရတာ။ ဒဏ်ရာရတဲ့သူတွေ ပြင်းထန်တဲ့ သူတွေလဲ ပါတယ်။ ဒီဘက်မှာ တိုက်ပွဲတွေလည်း အခုချိန်ထိ ဆက်တိုက်ဖြစ်နေပါတယ်”
ဒဏ်ရာရရှိထားတဲ့ ၄ ဦးကိုတော့ မိုးဗြဲကယ်ဆယ်ရေးအဖွဲ့နဲ့ ကျန်းမာရေးဌာနက သွားရောက်ကုသပေးတာဖြစ်ပြီး ဒဏ်ရာပြင်းထန်သူတွေတော့ ဆေးရုံကို လွှဲပြောင်းပေးထားတယ်လို့ အထက်ပါ သတင်းအရင်းအမြစ်က ပြောပါတယ်။
နောက်ထပ် မြေပြင်အခြေအနေ သိရှိသူ တစ်ဦးကတော့” စစ်တပ်က လေကြောင်းတွေအပါ တိုက်ခိုက်မှုတွေ လုပ်နေပါတယ်။ တော်လှန်ရေးတပ်ဖွဲ့တွေနဲ့ တိုက်ပွဲတွေ ပြင်းထန်နေသလို နှစ်ဖွဲ့စလုံးလည်း ထိခိုက်မှု သေဆုံးမှုများနိုင်တယ်”လို့ ပြောပါတယ်။
ပြီးခဲ့တဲ့ ဇန်နဝါရီကစပြီး ကရင်နီတော်လှန်ရေးအင်အားစုက ထိန်းချုပ်ထားတဲ့ မိုးဗြဲမြို့ကို စစ်တပ်က အင်အားအလုံးအရင်း အသုံးပြုပြီး ထိုးစစ်ဆင် တိုက်ခိုက်လာတာကြောင့် တိုက်ပွဲ ပြန်လည် ဖြစ်ပွားခဲ့တာ ဖြစ်ပါတယ်။
