ယာရူစိင်း၊ ဇန်နဝါရီ ၁၆ ရက်၊ နမ့်စန်
ရှမ်းတောင် နမ့်စန်မြို့နယ် ကာလေေကျးရွာမှာ နေထိုင်တဲ့ အမျိုးသမီးတစ်ဦးဟာ တရုတ်နိုင်ငံ ရွှေလီမြို့မှာ အလုပ် သွားလုပ်ရာကနေ ၈ လ ကြာတဲ့အထိ အဆက်အသွယ် ပြတ်တောက်သွားတယ်လို့ မိသားစုဝင်က ရွှေဖီမြေကို ပြောပါတယ်။
အသက် ၁၉ နှစ်အရွယ် မတင်မိုးလင်းဟာ ပြီးခဲ့တဲ့ ၂၀၂၃ ခုနှစ် နိုဝင်ဘာ ၁၅ ရက်က ရွှေလီမြို့မှာ အလုပ် သွားလုပ်မယ်ဆိုပြီး နေအိမ်ကနေ ထွက်သွားရာကနေ ပြီးခဲ့တဲ့ ၂၀၂၄ ခုနှစ် ဇွန်လအထိ အဆက်အသွယ် ရခဲ့ေပမဲ့ ဇူလိုင်လ နောက်ပိုင်းကစပြီး ဒီနေ့ ဇန်နဝါရီ ၁၆ ရက်အထိ အဆက်အသွယ် ပြတ်တောက်ခဲ့တာပဲ ဖြစ်ပါတယ်။
မိခင်ဖြစ်သူက “အစက လားရှိုးမှာ အလုပ် လုပ်မယ်ပေါ့။ ဒါပေမဲ့ လားရှိုးမှာ တိုက်ပွဲတွေဖြစ်တော့ အလုပ် မရတော့ဘူးေလ။ ဒါကြောင့် ပန်ဆန်းကို သွားတယ် သူ့ရဲ့ သူဌေးမနဲ့ပေါ့။ သူဌေးမနောက် လိုက်တယ်တော့ သူပြောပြတာဘဲ။ ကျမလည်း သေချာမသိရဘူး ဘာအလုပ် လုပ်တာလဲဆိုတာကို သူသေချာမပြောပြဘူး။ သူတရုတ်စကားလည်း မကျွမ်းဘူး။ သူဌေးမ ဘာခိုင်းခိုင်း အကုန်လုပ်ရတာပေါ့” လို့ ပြောပါတယ်။
မှတ်ပုံတင် မပါသွားတဲ့အတွက် ပန်ဆန်းဂိတ်မှာ ဖမ်းခံရပြီး နှစ်ပတ်အကြာမှ ပြန်လွှတ်လာတဲ့အကြောင်းကိုလည်း မိခင်ဖြစ်သူက ပြောပြပါတယ်။
“ဖမ်းခံရတဲ့လူတွေ များတယ် အမေ စိတ်မပူနဲ့တဲ့။ သမီးဘာမှမဖြစ်ဘူး ပြန်လွှတ်လာပြီနော်တဲ့။ တချို့လူတွေတော့ ဖမ်းခံရရင် အိမ်ပြန်လွှတ်တယ်လေ။ သူကျတော့ သူဌေးမက နေထိုင်ခွင့် အာမခံ ၃ လနဲ့ ေခါ်ထားတာဆိုတော့ အဲကြောင့် သူလည်း ဆက်နေတာပေါ့။ သူ့သူဌေးမက ပန်ဆန်းမှာ မနေတော့လို့ ရွှေလီဘက်မှာ တစ်ခါတည်း သူ့ကို ခေါ်သွားတာ။ ရွှေလီရောက်တော့ ငါးရက်လောက် အဆက်အသွယ် ရသေးတယ်။ အဲနောက်မှာ ဆက်သွယ်လို့လဲ မရတော့ဘူး ဒီနေ့အထိဘဲ”
လက်ရှိ ဖြစ်ပွားနေတဲ့ နိုင်ငံရေး အရှုပ်အထွေးကြောင့် သမီးဖြစ်သူအတွက် စိတ်ပူနေရပြီး တွေ့ရှိသူတွေအနေနဲ့ မိသားစုထံ ဆက်သွယ်အကြောင်းကြားပေးဖို့ကိုလည်း တောင်းဆိုထားပါတယ်။
