ယာရူစိင်၊ မတ်လ ၂၄ ရက်၊ နမ့်ခမ်း
ရှမ်းမြောက် နမ့်ခမ်းမြို့နယ် မိုင်းဝီးအုပ်စု ပန်ကနိုင်းရွာမှာ နေထိုင်တဲ့ အမျိုးသမီးငယ်တစ်ဦးဟာ မူဆယ်မြို့မှာ အလုပ်သွားလုပ်ရာကနေ ၂ လ ကြာတဲ့အထိ အဆက်အသွယ် ပြတ်တောက်သွားတယ်လို့ မိသားစုဝင်က ရွှေဖီမြေကို ပြောပါတယ်။
အသက် ၁၈ နှစ်အရွယ် လွေးအိုပေဟာ ပြီးခဲ့တဲ့ ဇန်နဝါရီ ၁၀ ရက်က မူဆယ်မြို့မှာ အလုပ်သွားလုပ်မယ်ဆိုပြီး နေအိမ်ကနေ ထွက်သွားရာကနေ ဇန်နဝါရီ ၂၅ ရက်အထိသာ အဆက်အသွယ် ရခဲ့ပြီးနောက် ဒီနေ့အထိ အဆက်အသွယ် ပြတ်တောက်ခဲ့တာပဲ ဖြစ်ပါတယ်။
“ရွာကနေ သူတစ်ယောက်တည်းဘဲ ထွက်လာတာ။ ရွှေလီမြို့ကို သူအရင်သွားတယ်။ အလုပ်တောင် သူလုပ်နေပြီ အဆင်မပြေလို့ဆိုပြီး အလုပ်ထွက်လိုက်တာ။ ထွက်တဲ့အကြောင်းကိုလည်း အကြောင်းမကြားဘူး။ မူဆယ်ဘက် လာလိုက်တယ်။ ဒါကြောင့် တရုတ်ရဲတွေ သူ့ကို ရှာသေးတယ်။ သူနဲ့ ဖုန်းပြောလို့ရတဲ့နေ့က သူနန်းတော်ပေါက်နားမှာ ရောက်နေပြီတဲ့” ဆိုပြီး မိသားစုဝင်တစ်ဦးက ပြောပါတယ်။
လက်ရှိ ဖြစ်ပွားနေတဲ့ နိုင်ငံရေး အရှုပ်အထွေးကြောင့် လွေးအိုပေအတွက် စိတ်ပူနေရပြီး ၎င်းကို တွေ့ရှိသူတွေအနေနဲ့ မိသားစုဝင်ထံ ဆက်သွယ်အကြောင်းကြားပေးဖို့ကိုလည်း တောင်းဆိုထားပါတယ်။
နမ့်ခမ်းအပြင် ရှမ်းမြောက်နဲ့ တခြားဒေသက လူထုတွေဟာ မူဆယ်နဲ့တရုတ်နိုင်ငံဘက် အလုပ် လုပ်ဖို့ သွားရာကနေ ပွဲစားတချို့ရဲ့ လိမ်လည်မှုကို ခံရပြီး လူကုန်ကူးခံရတာ၊ အတင်းအဓမ္မ အလုပ် လုပ်ခိုင်းတာနဲ့ မကြာခဏ ကြုံတွေ့နေရပါတယ်။
