ရဲမာန်၊ စက်တင်ဘာ ၂၉ ရက်၊ မြစ်ကြီးနား
ကချင်ပြည်နယ် မြစ်ကြီးနားမြို့ သီတာရပ်ကွက် ဆုတောင်းပြည့်ဘုရားအနီးမှာ ဓားထိုးခံထားရတဲ့ အမျိုးသမီးတစ်ဦးသေဆုံးသွားခဲ့တယ်လို့ ဧရာဝတီဂရုဏာ လူမှုကူညီရေးအသင်းရဲ့ အဖွဲ့ထံက သိရပါတယ်။
အဲဖြစ်စဉ်ဟာ မနေ့ စက်တင်ဘာ ၂၈ ရက် ညနေ ၄ နာရီခွဲမှာ ဖြစ်ပွါးခဲ့တာဖြစ်ပြီး ၎င်းအမျိုးသမီးဟာ ညာဘက်နားအောက်တည့်တည့်မှာ ဓားထိုးစိုက်ထားခံထားရရင်းနဲ့ သေဆုံးနေတာဖြစ်တယ်လို့ ၎င်းကဆိုပါတယ်။
“ဖြစ်ရိုးဖြစ်စဉ်တော့ မသိလိုက်ရဘူး။ ကျနော်တို့ကို ဖုန်းဆက်ပြီး ကျနော်တို့ရောက်သွားတဲ့အချိန်မှာတော့ ဓားတန်းလန်းနဲ့ လဲနေတာ။ ကျနော်တို့လည်း အမျိုးမျိုးကြားနေရတာ။ အဲပတ်ဝန်းကျင်ရောက်သွားတဲ့အချိန်မှာ ဘေးနားကလူတွေပြောတာတော့ သမီးရည်းစားချင်း ရန်ဖြစ်တာကနေစတာ။ ပစ္စည်းလုတာတို့လည်းပြောကြတယ်။ မျိုးစုံတော့ ကြားနေရတယ်”
သေဆုံးသွားတဲ့ အမျိုးသမီးဟာ အသက် ၂၀ ဝန်းကျင်ရှိပြီး ၎င်းမိသားစုဝင် ဘယ်သူဘယ်ဝါဖြစ်တယ်ဆိုတာ မသိရသေးဘူးလို့ ၎င်းက ဆက်ပြောပါတယ်။
“အလောင်းပိုင်ရှင် ဘာညာတော့မတွေ့ရသေးဘူး။ ဘာလို့ဆို ကျနော်တို့ ရုပ်လောင်းကိုတွေ့ရှိတဲ့အချိန်ကြတော့ ရုပ်အလောင်းခန္ဒာကိုယ်မှာ သူရဲ့ကိုယ်ပိုင်ပစ္စည်းဆိုလို့ ဖုန်းတွေ မှတ်ပုံတင် ဘာမှပါမလာဘူး။ သူဆီမှ ကျန်ခဲ့တာဆိုလို့ ဆွဲကြိုး၊ လက်စွပ်၊ ဦးထုပ်နဲ့ အဝတ်စားတွေဘဲ ကျန်ခဲ့တာ”လို့ ၎င်းက ဆက်ပြောပါတယ်။
မြစ်ကြီးနားမြို့မှာ ပြီးခဲ့တဲ့လအတွင်း လူ ၇ဦးထက်မနည်း လုယက်သတ်ဖြတ်ခံခဲ့ရပြီး ဖုန်း၊ ဆိုင်ကယ်နဲ့ ဆွဲကြိုး လုယက်မှုကလည်း နေ့စဉ်လိုလို ဖြစ်ပွားနေတယ်လို့ နောက်ထပ် ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
