လွေးထွေး၊ ဇန်နဝါရီ ၁၅ ရက်၊ သိန္နီ
ကိုးကန့်တပ်- MNDAA ထိန်းချုပ်ထားတဲ့ လားရှိုးနဲ့ သိန္နီမြို့နယ်ကြားက နားဆော့ရွာအနီးမှာ အသက် ၄ဝ အရွယ် အမျိုးသမီးတစ်ဦး ဓားပြ တိုက်ခံရပြီး တရုတ်ငွေ ယွမ် ၇ ထောင် (ကျပ်သိန်း ၄ဝ ကျော်) ပါသွားပါတယ်။
အမည်မသိ လက်နက်ကိုင်တစ်စုက လားရှိုးကနေ ပြန်လာတဲ့ အမျိုးသမီးတစ်ဦးကို သေနတ်ထောက် ခြိမ်းခြောက်ပြီး ယွမ် ၇ ထောင် ယူဆောင်သွားခဲ့တယ်လို့ ဖြစ်စဉ်သိရှိသူ အမျိုးသားတစ်ဦးရဲ့ ပြောပြချက်အရ သိရပါတယ်။
ဖြစ်စဉ်ဟာ မနေ့ ဇန်နဝါရီ ၁၄ ရက် ညနေ ၆ နာရီခန့်က ဖြစ်ပွားခဲ့ပြီး ဓားပြတိုက်သူဟာ ဆိုင်ကယ် ၃ စီးနဲ့ အရပ်သားဝတ်စုံ ဝတ်ထားတဲ့ အသက် ၂၀ ကျော်အရွယ် အမျိုးသား ၅ ဦး ဖြစ်ပြီးတော့ ခေါင်းကို သေနတ်နဲ့ထောက်ကာ လွယ်အိတ်ထဲက ငွေကို ယူဆောင်သွားခဲ့တာပဲ ဖြစ်ပါတယ်။
ဖြစ်စဉ်သိရှိသူ နားဆော့ရွာခံ အမျိုးသားက “လူကို ဘာမှ မလုပ်သွားတာ ကံကောင်းတယ်။ အဲအမျိုးသမီးက ကြောက်ပြီး တုန်နေတာ။ သူက ဘယ်ရွာကလဲ မမေးမိဘူး။ သူလားရှိုးက ပြန်လာတာတော့ သူပြောပြတယ်။ ရွာနားလေးဘဲ ဖြစ်သွားတာ” လို့ ပြောပါတယ်။
အလားတူ MNDAA ထိန်းချုပ်ထားတဲ့ လားရှိုးမြို့မှာလည်း ပြီးခဲ့တဲ့ ဇန်နဝါရီ ၁၃ ရက်မှာ ရပ်ကွက် ၁ နယ်မြေ ၉ က အမျိုးသားတစ်ဦး ပြန်ပေးဆွဲခံခဲ့ရပြီး မနေ့ ဇန်နဝါရီ ၁၄ ရက် ည ၇ နာရီခန့်မှာတော့ ပြန်ပေးဆွဲသူ ၃ ဦးကို ကိုးကန့်တပ်က လားရှိုးမြို့ပြင်မှာ ပစ်ခတ်ဖမ်းဆီးခဲ့ပါတယ်။
