အိုက်ပွီး၊ ဇန်နဝါရီ ၅ ရက်၊ ကလေး
စစ်ကိုင်းတိုင်း ကလေးမြို့နယ် လက်ပံချောင်းရွာမှာ စစ်ကောင်စီတပ် ပစ်ခတ်တဲ့ လက်နက်ကြီးကျည်ကြောင့် အမျိုးသမီးတစ်ဦး သေဆုံးပြီး နှစ်ဦး ပြင်းထန်ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။
လက်ပံချောင်းရွာမှာ တိုက်ပွဲ ဖြစ်ပွားခြင်းမရှိဘဲ စစ်တပ်က ဒီနေ့ ဇန်နဝါရီ ၅ ရက် မနက် ၈ နာရီမှာ ကလေးမြို့ အမြှောက်တပ်ရင်းကနေ လက်နက်ကြီးကျည် ရမ်းသမ်းပစ်ခတ်တာကြောင့် အရပ်သားတွေ ထိခိုက်သေဆုံးခဲ့တာ ဖြစ်ပါတယ်။
“လက်နက်ကြီးကျည် ထိမှန်တာက သုံးယောက်ပါ။ တစ်ယောက်က မနက် ၁၀ နာရီလောက်မှာ ဒဏ်ရာ ပြင်းထန်တာကြောင့် ဆုံးသွားတယ်။ နောက်ထပ် နှစ်ယောက်လည်း ဒဏ်ရာ ပြင်းထန်တယ်။ ဆေးကုသမှုခံယူနေရတယ်” လို့ ဒေသခံတစ်ဦးက ရွှေဖီမြေသို့ ပြောပါတယ်။
သေဆုံးသူဟာ အသက် ၄၇ နှစ်အရွယ် ဒေါ် ဇန်ဘွဲ့စုံလို့ သိရပြီး သူ့မှာ အမျိုးသားနဲ့ သားသမီး ၄ ဦး ကျန်ရစ်ခဲ့တယ်လို့ သိရပါတယ်။
မနေ့ ဇန်နဝါရီ ၄ ရက် ညနေ ၄ နာရီဝန်းကျင်ကလည်း လက်ပံချောင်းရွာကို စစ်တပ်က လက်နက်ကြီး ၃ ကြိမ်ထက်မနည်း ပစ်ခတ်ခဲ့ပြီး အရပ်သားနေအိမ် ထိခိုက်ပျက်စီးသွားပါတယ်။
စစ်တပ် အာဏာသိမ်းပြီးနောက် နိုင်ငံတစ်ဝှမ်း စစ်ကောင်စီတပ်ရဲ့ သတ်ဖြတ်မှုကြောင့် အရပ်သား ၆,၁၀၆ ဦး သေဆုံးခဲ့တယ်လို့ AAPP က ဇန်နဝါရီ ၃ ရက်က ထုတ်ပြန်လာပါတယ်။
