မိုင်းရူပ၊ သြဂုတ် ၅ ရက်၊ စဥ့်ကူး
တော်လှန်ရေးတပ်တွေထိန်းချုပ်ထားတဲ့ မန္တလေးတိုင်း စဉ့်ကူးမြို့နယ် တရော်ပင်ရွာ စာသင်ကျောင်း လေကြောင်းနဲ့ တိုက်ခိုက်ခံရပြီး အမျိုးသမီးတစ်ဦး ထိမှန်ဒဏ်ရာရခဲ့တယ်လို့ ရွှေဖီမြေက စုံစမ်းသိရှိရပါတယ်။
မနေ့ သြဂုတ် ၄ ရက် ညသန်းခေါင်ယံ ၁၂ နာရီဝန်းကျင်မှာ စစ်တပ်ဘက်က တရော်ပင်ကျေးရွာကို လေကြောင်းနဲ့ တိုက်ခိုက်ခဲ့ပြီး အမျိုးသမီးတစ်ဦး ခြေထောက်မှာ ဗုံးဆထိမှန်ပြီး ထိခိုက်ဒဏ်ရာရခဲ့ပါတယ်။
“အဲစာသင်ကျောင်းက ပိတ်ထားတာ။ ဘာတိုက်ပွဲမှ မရှိဘဲ လာကြဲတာ။ အမျိုးသမီးယောက် ခြေထောက်မှာ ဒဏ်ရာရတယ်။ ဒဏ်ရာတော့ မပြင်းထန်ဘူး” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
စစ်တပ်ရဲ့ ဗုံးကြဲတိုက်ခိုက်မှုကြောင့် တရော်ပင်ကျေးရွာရဲ့ စာသင်ကျောင်းလည်း ပျက်စီးသွားတယ်လို့ သိရပါတယ်။
စစ်ကောင်စီတပ်ဟာ သပိတ်ကျင်းမြို့နယ်အပါအဝင် မန္တလေးတိုင်းထဲက ၎င်းတို့လက်လွှတ်ထားရတဲ့ မိုးကုတ်၊ မတ္တရာ၊ စဥ့်ကူးမြို့နယ်တွေထဲကို လေကြောင်းတိုက်ခိုက်မှုတွေ ဆက်တိုက်ပြုလုပ်နေတာ ဖြစ်ပါတယ်။
ပြီးခဲ့တဲ့ သြဂုတ် ၁ ရက်ကနေ ၃ ရက်နေ့အထိ သပိတ်ကျင်းမြို့နယ်ထဲက ကျေးရွာ ၄ ရွာထပ်မနည်းကို စစ်တပ်က တိုက်လေယာဥ်နဲ့ ဗုံး ၃ ရက်ဆက်တိုက်ကြဲချတိုက်ခိုက်ခဲ့ပြီး အရပ်သား ၈ ဦးသေဆုံးပြီး ၅ ဦး ထက်မနည်းဒဏ်ရာရခဲ့ပါတယ်။
သြဂုတ် ၂ ရက်မှာလည်း တအာင်းတပ်မတော်-PSLF/TNLA ထိန်းချုပ်ထားတဲ့ မိုးကုတ်မြို့ကို လေကြောင်းနဲ့ တိုက်ခိုက်ခံရာ အရပ်သား ၁၃ ဦးသေဆုံးပြီး ၁၀ ထက်မနည်း ထိခိုက်ဒဏ်ရာရခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
