အိုက်ပွီး၊ စက်တင်ဘာ ၄ ရက်၊ မင်းတပ်
ချင်းပြည်နယ် မင်းတပ်မြို့နယ် လေရှိကျေးရွာမှာ ဒီနေ့ စက်တင်ဘာလ ၄ ရက် နေ့လယ်အချိန်မှာ အိမ်စျေးဆိုင် ရောင်းနေတဲ့ အမျိုးသမီးတစ်ဦး လုယက်ခံရပြီး အသတ်ခံလိုက်ရတယ်လို့ မိသားစုဝင်နဲ့ နီးစပ်သူတစ်ဦးက ရွှေဖီမြေသို့ ပြောပါတယ်။
“စျေးဆိုင်က ရွာရဲ့ အစွန်ဆုံးမှာ ရှိတာပါ။ အမျိုးသားက ဆိုင်ထဲလာပြီး အမျိုးသမီးဆီက ပိုက်ဆုံလုပြီး ရွှေတွေပါ လုတာပါ။ အဲမှာအမျိုးသမီးက မပေးလို့ အမျိုးသားက ပါလာတဲ့ ဓားနဲ့ ၁၃ ချက် ထိုးပြီး အူတွေပါပွင့်ပြီး အမျိုးသမီးက သေဆုံးသွားတယ်” လို့ မိသားစုဝင်နဲ့ နီးစပ်သူတစ်ဦးက ရွှေဖီမြေသို့ ပြောပါတယ်။
သေဆုံးသူအမျိုးသမီးဟာ အသက် ၃၀ ဝန်းကျင်ရှိတဲ့ ဒေါ်ပါရ်အီးဆိုသူဖြစ်ပြီး သူ့မှာ သားတစ်ယောက်နဲ့ အမျိုးသားတို့ ကျန်ရစ်ပြီး အမျိုးသားဖြစ်သူမှာ ခရီးလွန်နေတယ်လို့ သိရပါတယ်။
လက်ရှိမှာ ပြစ်မှုကျူးလွန်သူ လူသတ်တရားခံကိုလည်း CDF-Mindat က ဖမ်းဆီးထားပြီး ဘယ်လိုအရေးယူ ဆောင်ရွက်သွားမယ်ဆိုတာကိုတော့ မသိရသေးဘူးလို့ ဆိုပါတယ်။
“တရားခံကိုတော့ ချက်ချင်း ဖမ်းဆီးနိုင်ခဲ့ပါတယ်။ မင်းတပ်ဒေသခံတော့ မဟုတ်ဘူး။ ယောဘက်ကပါ။ စစ်ဘေးရှောင်လား။ ကယ်ရီသမားလား မသိဘူး။ စစ်ဆေးနေတုန်းပါ။ အမျိုးသားက အမျိုးမျိုး ထွက်ဆိုနေတယ်” လို့ မင်းတပ်မြို့နယ် ဒေသခံတစ်ဦးက ရွှေဖီမြေသို့ ပြောပါတယ်။
လက်ရှိ အခင်းဖြစ်ပွားခဲ့တဲ့ ဒီလေရှိကျေးရွာဟာ မင်းတပ်-မတူပီ ကားလမ်းမပေါ်မှာ တည်ရှိနေတဲ့ ကျေးရွာလည်း ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
