မိုင်းအရှိုင်း၊ စက်တင်ဘာ ၂၆ ရက်၊ ကွတ်ခိုင်
တအာင်းတပ်- PSLF/TNLA ထိန်းချုပ်ထားတဲ့ ကွတ်ခိုင်မြို့နယ် မန်ပိန်းကျေးရွာနေ အမျိုးသမီးတစ်ဦးက နမ့်ခိုင်ရေချောင်းကိုဖြတ်ဖို့ လုပ်နေစဉ် တံတားပေါ်မှာ ခြေချော်ပြီး ရေထဲ မျှောပါပျောက်ဆုံးသွားခဲ့တယ်လို့ စုံစမ်းသိရှိရပါတယ်။
အဲဒီအမျိုးသမီးဟာ အသက် ၂၈ နှစ်အရွယ် မအမ်ကာဖြစ်ပြီး သူ့ရဲ့ သူငယ်ချင်းတွေနဲ့ ပြီးခဲ့တဲ့ စက်တင်ဘာ ၂၃ ရက် တောထဲ ပုစဉ်းရင်ကွဲ သွားရှာတဲ့အချိန်မှာ တံတားပေါ်ကနေ ရေထဲ ပြုတ်ကျခဲ့တာပဲ ဖြစ်ပါတယ်။
ဖြစ်စဉ်သိရှိသူတစ်ဦးက “တောထဲ အကောင်သွားရှာဖို့ သစ်တံတားကို ဖြတ်ဖို့လုပ်တာ။ သူ့သူငယ်ချင်းတွေတော့ ဖြတ်ပြီးသွားပြီ။ သူက ခြေချော်ကျပြီးတော့မှ ရေထဲ ပါသွားတာ။ ချောင်းရေတွေလည်း တော်တော်ကြီးနေတာ။ ရေတောင်မှ နောက်နေတာဆိုတော့” ဆိုပြီး ပြောပါတယ်။
ဒီနေ့ ၄ ရက်မြောက်နေ့အထိ အဲဒီအမျိုးသမီးကို PSLF/TNLA ရဲ့ အုပ်ချုပ်ရေးအဖွဲ့နဲ့ မိသားစုဝင်၊ ရပ်ရွာအုပ်ချုပ်ရေးမှူးတွေ စုပေါင်းပြီး ရှာဖွေနေဆဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
