လွေးဇွန်မိုး၊ မေလ ၃၀ ရက်၊ နမ့်ခမ်း
ကိုးကန့်ဒေသ ရှမ်းမြောက် လောက်ကိုင်ကို အလုပ်သွားလုပ်တဲ့ နမ့်ခမ်းမြို့နယ်၊ လွယ်ဟွမ်ကျေးရွာအုပ်စု၊ တွန်ကော်ရွာက အမျိုးသမီးတစ်ဦး တစ်နှစ်ကျော်ကြာတဲ့အထိ မိသားစုဝင်တွေနဲ့ အဆက်အသွယ်မရပဲ ပျောက်ဆုံးနေတယ်လို့ သိရပါတယ်။
အသက် ၂၃ နှစ်ဝန်းကျင်အရွယ် လွေးအေအောင်အေးဟာ လောက်ကိုင်မြို့မှာ အလုပ်သွားလုပ်ရင်း ပြီးခဲ့တဲ့ ၂၀၂၃ ခုနှစ် ဒီဇင်ဘာလ လောက်ကိုင်မှာ တိုက်ပွဲဖြစ်ပွားချိန်ကစပြီး လက်ရှိ ၂၀၂၅ ခုနှစ် မေလ ၃၀ ရက်အထိ မိသားစုဝင်တွေနဲ့ အဆက်အသွယ် မရတော့ပဲ ပျောက်ဆုံးနေတယ်လို့ မိသားစုဝင်နဲ့ နီးစပ်သူ အမျိုးသားတစ်ဦးက ပြောပါတယ်။
“သူက လောက်ကိုင်မှာ အလုပ်လုပ်တာ။ အရင်တုန်းက သူ့အဖေနဲ့ အဆက်အသွယ်ရတယ်လေ။ အဲဒီ လောက်ကိုင်မှာ တိုက်ပွဲဖြစ်တဲ့အချိန်ကစပြီး သူ့အဖေက သူနဲ့ အဆက်အသွယ် ပြတ်သွားတော့တာပဲ။ သူဖုန်းဆက်လည်း ဧရိယာပြင်ပပဲပြောနေတာ။ သူဘက်ကလည်း ဒီနေ့အထိပြန်မဆက်လာတော့ဘူး။ သေလား။ ရှင်လားလဲ မသိရဘူး”
မိသားစုဝင်တွေက စိတ်ပူနေတာကြောင့် လွေးအေအောင်အေးကို တွေ့ရှိခဲ့ရင် ၀၉ – ၆၇၃၀၃၆၉၅၄ ကို ဆက်သွယ်အကြောင်းကြားပေးဖို့ အထက်ပါအမျိုးသားက တောင်းဆိုထားပါတယ်။
လောက်ကိုင်မြို့ကို ကိုးကန့်တပ် (MNDAA)က ၂၀၂၄ ခုနှစ် ဇန်နဝါရီလ ၅ ရက်နေ့က အပြီးသတ်သိမ်းပိုက်ခဲ့တာဖြစ်ပြီး လက်ရှိမှာ လောက်ကိုင်ကို MNDAA တပ်က ထိန်းချုပ်ထားတာဖြစ်ပါတယ်။
လောက်ကိုင်တိုက်ပွဲအတွင်း အရပ်သားအများအပြား သေဆုံးခဲ့သလို အလုပ်သွားရောက်လုပ်ကိုင်နေတဲ့ လူငယ်အများအပြားလည်း ပျောက်ဆုံးတာတွေ ရှိခဲ့ပြီး စာရင်းအတိအကျတော့ မသိရပါဘူး။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
