မြတ်နိုး၊ အောက်တိုဘာ ၁၄ ရက်၊ လိုင်ဇာ
ကချင်ပြည်နယ် လိုင်ဇာအနီးက မုန်လိုင်ချောင်းမှာ မနေ့ အောက်တိုဘာလ ၁၄ ရက် ညနေပိုင်းက ကျောင်းသားတစ်ဦး ရေကူးရင်း မျောပါသေဆုံးသွားကြောင်း ဒေသခံတွေဆီက သိရပါတယ်။
“တဖက်ကမ်းကို ရေကူးပြီး လာနေတာ။ ရေလယ်ရောက်တော့ ရေမွန်းသွားတာ ထင်တယ်။ ကယ်ကြပါအုံးလို့ အော်ပြီး မျောပါသွားတယ်” လို့ သေဆုံးသွားသူနဲ့အတူ ရေသွားချိုးခဲ့သူက ပြောပါတယ်။
မုန်လိုင်ချောင်းတံတားအောက်မှာ ရေသွားချိုးပြီး အိမ်ပြန်ဖို့ ချောင်းတဖက်ကမ်းကို ကူးလာချိန် မနေ့ ညနေ ၄ နာရီခွဲကျော်ခန့်မှာပဲ ဖြစ်သွားတာလို့ သူက ဆိုပါတယ်။
“ရေထဲမျှောပါသွားလို့ အဲဒီချောင်းနားမှာ ရှိနေတဲ့ လူ လေး၊ ငါးယောက်ကို အကူအညီတောင်းပြီး လိုက်ရှာတယ်။ ရှာမတွေ့ဘူး။ ရှာမတွေ့လို့ အိမ်ပြန်ပြီး သူ့မိဘတွေကို သွားပြောပြတာ” လို့ သူက ရှင်းပြပါတယ်။
ရေနစ်မျှောပါသေဆုံးသွားသူဟာ လိုင်ဇာက ရပ်ကွက် ၁ မှာ နေထိုင်တဲ့ အသက် ၁၈ နှစ်အရွယ် ဇော်ဖုန်းအောင်ဆိုသူဖြစ်ပြီး ကျောင်းသားဖြစ်ကြောင်းကိုလည်း ဒေသခံတွေဆီက သိရပါတယ်။
ပြီးခဲ့တဲ့ ၂၀၂၃ ခုနှစ် ဩဂုတ်လ ၁၂ ရက်နေ့ မနက်ပိုင်းကလည်း လိုင်ဇာအနီးက မုန်လိုင်ချောင်းမှာ တရုတ်ဘက်ခြမ်းက ရေကူးဖြတ်လာတယ်လို့ ယူဆရတဲ့ အမည်မသိ အမျိုးသမီးတစ်ဦး ရေနစ်သေဆုံးကာ မျှောပါလာခဲ့တဲ့ ဖြစ်စဉ်လည်း ရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
