ယာရူစိင်၊ ဧပြီ ၁၀ ရက်၊ ကောလင်း
စစ်ကိုင်းတိုင်း ကောလင်းမြို့နယ် အရှေ့ခြမ်း အင်ပင်လှရွာ စာသင်ကျောင်းကို စစ်ကောင်စီတပ် လေကြောင်းကနေ ဗုံးကြဲတိုက်ခိုက်လို့ အမျိုးသမီး ၁ ဦး သေဆုံးပြီး ၃ ဦး ပြင်းထန် ဒဏ်ရာရရှိတယ်လို့ ဒေသခံတွေက ရွှေဖီမြေကို ပြောပါတယ်။
ဒီနေ့ ဧပြီ ၁၀ ရက် နေ့လယ် ၂ နာရီဝန်းကျင်အချိန်မှာ ကောလင်းမြို့နယ် အင်ပင်လှရွာကို စစ်တပ်က ဂျက်ဖိုက်တာနဲ့ လာရောက်ပြီး ပေါင် ၅၀၀ ဗုံးနှစ်လုံးနဲ့ လေကြောင်းကနေ ဗုံးကြဲတိုက်ခိုက်တာကြောင့် စစ်ရှောင်က ၁၄ နှစ်အရွယ် မဇင်မာဝင်း သေဆုံးခဲ့ရတယ်လို့ ဒေသခံ တစ်ဦးက ပြောပါတယ်။
“ဒီနေ့ နေ့လယ် အင်ပင်လှရွာ စာသင်ကျောင်းကို လာကြဲသွားတယ်။ ကျောင်းပေါ် တည့်တည့် တစ်လုံးကျတယ်။ ကျောင်းဝန်းထဲ တစ်လုံးကျတယ်။ စစ်ရှောင်က တစ်ဦး သေတယ်။ ဒဏ်ရာရတာက အမျိုးသမီး နှစ်ယောက်နဲ့ အဘိုးအို တစ်ယောက်ပါ။ ဒဏ်ရာ ပြင်းထန်နေပါတယ်”
မနေ့ကလည်း ကောလင်းခရိုင်ဖြစ်တဲ့ ဝန်းသိုမြို့နယ် နန်းခမ်းကျေးရွာဆေးရုံအနီးကို လေကြောင်းဗုံးကြဲတိုက်ခိုက်ခဲ့တာကြောင့် အရပ်သား ၂၆ ဦး သေဆုံးပြီး ၅၀ ဦးဝန်းကျင် ဒဏ်ရာရရှိခဲ့ပါတယ်။
ဒါ့အပြင် ချင်းညီနောင်ထိန်းချုပ်ထားတဲ့ ချင်းပြည်နယ် မင်းတပ်မြို့နယ် ဖွီကျေးရွာနဲ့ တီးတိန်နယ်ထဲကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်လို့ လသားအရွယ်ကလေးငယ်တွေအပါအဝင် ၁၂ ဦး သေဆုံးပြီး ၉ ဦးထက်မနည်း ဒဏ်ရာရရှိခဲ့ပါတယ်။
