မိုင်းပန်ပျော်၊ မတ်လ ၂၃ ရက်
ရှမ်းတောင်နဲ့ ကရင်နီနယ်စပ် နန်းမယ်ခုံမြို့နယ်က စစ်ဘေးရှောင်စခန်းတစ်ခုမှာ မိုးသက်လေပြင်းကြောင့် စာသင်ကျောင်းဆောင် ၂ ဆောင် ထိခိုက်ပျက်စီးခဲ့ပြီး ကျောင်းဆောင် ပြန်လည်ပြုပြင်ဖို့ အကူအညီ လိုအပ်နေပါတယ်။
မတ်လ ၂၁ ရက် နေ့လယ် ၂ နာရီဝန်းကျင်မှာ နန်းမယ်ခုံမြို့နယ်ထဲမှာရှိတဲ့ စစ်ဘေးရှောင်စခန်းတစ်ခုမှာ ၁ နာရီကြာ မိုးသက်လေပြင်း တိုက်ခတ်ခဲ့တာကြောင့် စာသင်ကျောင်းဆောင် ၂ ဆောင် ထိခိုက်ပျက်စီးခဲ့တယ်လို့ ကရင်နီပြည်နယ် စေတနာ့ဝန်ထမ်း တာဝန်ခံ စတီဗင်ပါက ရွှေဖီမြေကို ပြောပါတယ်။
“နေ့လယ် ၂ နာရီဝန်းကျင်မှာစပြီး လေပြင်းတိုက်တယ် မိုးလည်း ရွာတယ်ဗျ။ ကြာချိန်ကတော့ ၁ နာရီဝန်းကျင်ဆိုပေမဲ့ လေနဲ့မိုးပြင်းတာမို့ ကျောင်းဆောင်တွေက အတော်ပျက်စီးကုန်တယ်”
အဲဒီစာသင်ကျောင်းဆောင် ၂ ခုဟာ ကျောင်းသူကျောင်းသားနဲ့ စာသင်ကြားပေးတဲ့ဆရာဆရာမ စုစုပေါင်း ၄၀၀ နီးပါး အသုံးပြုနေတဲ့နေရာ ဖြစ်ပါတယ်။
မိုးသက်လေပြင်းကြောင့် စာသင်ကျောင်းဆောင် ထိခိုက်ပျက်စီးခဲ့တာကြောင့် ကျောင်းဆောင် ပြန်လည် ပြုပြင်ဖို့အတွက် မိုးကာနဲ့ ကျောင်းဆောင်အကာတွေ လိုအပ်နေတယ်လို့ ၎င်းက ဆက်ပြောပါတယ်။
စစ်ရှောင်စခန်းမှာ နေထိုင်သူတွေဟာ တိုက်ပွဲကြောင့်နဲ့ ရေဘေးအန္တရာယ်ကြောင့် လွိုင်ကော်အနောက်ဖက်ခြမ်းကနေ ပြောင်းရွှေ့လာကြသူတွေ ဖြစ်ပါတယ်။
