မိုင်းရူပ၊ ဧပြီ ၂၈ ရက်၊ စဥ့်ကူး
မန္တလေး PDF နဲ့ ပူးပေါင်းတပ်တွေ ထိန်းချုပ်ထားတဲ့ မန္တလေးတိုင်း စဥ့်ကူးမြို့ပေါ်ရှိ စာသင်ကျောင်းနဲ့ဘုန်းကြီးကျောင်း လေယာဥ်နဲ့ ဗုံးကြဲခံရပြီး အဆောက်အဦးတွေ ပျက်စီးသွားတယ်လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
မနေ့ ဧပြီ ၂၇ ရက် မနက် ၁၀ နာရီခွဲဝန်းကျင်မှာ စဥ့်ကူးမြို့ပေါ်ရှိ အခြေခံပညာအထက်တန်းကျောင်းနဲ့ မယာဝေယံဘုံသာ ဘုန်းကြီးကျောင်းကို ဂျက်လေယာဥ်နဲ့ ဗုံး ၂ ကြိမ် ကြဲချတိုက်ခိုက်ခဲ့တာပဲ ဖြစ်ပါတယ်။
“ဘုန်းကြီးကျောင်းနဲ့ စာသင်ကျောင်းကို ကြဲတာ။ အဆောက်အဦးတွေ ပျက်တာရှိတယ်။ လူအထိအခိုက်တော့ မရှိဘူး” လို့ မြေပြင်မှာ ရှိနေသူ အမျိုးသမီးတစ်ဦးက ရွှေဖီမြေကို ပြောပါတယ်။
ဗုံးကြဲတိုက်ခိုက်မှုကြောင့် အဆောက်အဦး ၃ လုံး ပျက်စီးခဲ့ပြီး လူထုတွေအနေနဲ့ လေကြောင်းရန် သတိထားဖို့ လိုအပ်ကြောင်း ပြည်သူ့ကာကွယ်ရေးအဖွဲ့ ပြင်ဦးလွင်ခရိုင်က ထုတ်ပြန်ထားပါတယ်။
စစ်တပ်က အပစ်ရပ်မယ်လို့ ထုတ်ပြန်ထားပေမဲ့ တော်လှန်ရေးအင်အားစုတွေ ထိန်းချုပ်ထားတဲ့ ဒေသတွေကို လေကြောင်း တိုက်ခိုက်မှု ဆက်တိုက်လုပ်ဆောင်နေပြီး အရပ်သား ထိခိုက်သေဆုံးမှုလည်း ဆက်လက် တိုးလာနေပါတယ်။
ပြီးခဲ့တဲ့ ဧပြီ ၁ ရက်ကနေ ဧပြီ ၁၉ ရက်အထိ မန္တလေးတိုင်း သပိတ်ကျင်း၊ မတ္တရာနဲ့ စဥ့်ကူးမြို့နယ်မှာ လေကြောင်း တိုက်ခိုက်မှုကြောင့် သေဆုံးသူ ၄၁ ဦးနဲ့ ဒဏ်ရာရသူ ၅၈ ဦး ရှိခဲ့တယ်လို့ မန္တလေး PDF က ထုတ်ပြန်ထားပါတယ်။
