မိုင်းရူပ၊ ဖေဖော်ဝါရီ ၁၄ ရက်၊ ဒီးမော့ဆို
ကရင်နီပြည် ဒီးမော့ဆိုမြို့နယ် အနောက်ခြမ်းရှိ စာသင်ကျောင်းနဲ့ ဆေးပေးခန်းတစ်ခုကို စစ်ကောင်စီတပ်က လေကြောင်းနဲ့ တိုက်ခိုက်ခဲ့တယ်လို့ မြေပြင်အခြေအနေ သိရှိသူတွေက ရွှေဖီမြေကို ပြောပါတယ်။
မနေ့ ဖေဖော်ဝါရီ ၁၃ ရက် နေ့လယ် ၂ နာရီဝန်းကျင်မှာ စစ်တပ်က ဂျက်လေယာဉ်နဲ့ ဗုံးကြဲတိုက်ခိုက်ခဲ့တာဖြစ်ပြီး စာသင်ကျောင်းနဲ့ ဆေးပေးခန်းအပါအဝင် အဆောက်အဦးတချို့ ထိမှန်ပျက်စီးခဲ့ပါတယ်။
“လေယာဉ်နဲ့ လာကြဲသွားတာ ဟုတ်ပါတယ်။ ဒီးမော့ဆို အနောက်ခြမ်းက စာသင်ကျောင်းနဲ့ ဆေးပေးခန်းကို လေယာဉ် ကြဲချခဲ့တာပါ” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
စာသင်ကျောင်း ပိတ်ထားချိန် ဖြစ်တာကြောင့် ထိခိုက်သေဆုံးမှုတော့ မရှိသေးဘူးလို့ သိရပါတယ်။
ဒါ့အပြင် စစ်တပ်က နေ့စဉ်လိုလို လက်နက်ကြီးနဲ့ ပစ်ခတ်တိုက်ခိုက်နေတာကြောင့် ဒီးမော့ဆိုအနောက်ခြမ်းရှိ စစ်ဘေးရှောင်တွေဟာ စိုးရိမ်နေရပြီး အိမ်တိုင်းလိုလို ကတုတ်ကျင်း တူးထားရတယ်လို့ စစ်ဘေးရှောင်တွေက ရွှေဖီမြေကို ပြောဆိုထားပါတယ်။
ပြီးခဲ့တဲ့ ဖေဖော်ဝါရီ ၉ ရက်မှာလည်း စစ်တပ်ရဲ့ လက်နက်ကြီးကြောင့် ဒီးမော့ဆို အနောက်ခြမ်းရှိ အသက် ၃၀ ဝန်းကျင် အမျိုးသားတစ်ဦး ထိခိုက်ဒဏ်ရာ ရခဲ့ပါတယ်။
ရှမ်းတောင်-ကရင်နီနယ်စပ်ရှိ ဖယ်ခုံမြို့နယ် မိုးဗြဲမြို့မှာတော့ စစ်တပ်နဲ့ ကရင်နီ တော်လှန်ရေးအင်အားစုတွေအကြား တိုက်ပွဲ ဆက်လက် ဖြစ်ပွားနေတယ်လို့ သိရပါတယ်။
ပြီးခဲ့တဲ့ ဇန်နဝါရီအတွင်း စစ်တပ်ရဲ့ လေကြောင်းနဲ့ လက်နက်ကြီးကြောင့် ကလေးငယ် ၂ ဦးအပါအဝင် အရပ်သား ၆ ဦး သေဆုံးပြီး ၁၆ ဦး ဒဏ်ရာ ရခဲ့တယ်လို့ ကရင်နီ လူမှုအသင်းအဖွဲ့များကွန်ရက်- KCSN က ပြီးခဲ့တဲ့ ဖေဖော်ဝါရီ ၅ ရက်မှာ ထုတ်ပြန်ထားပါတယ်။
