ပို့လဘား၊ မေလ ၁၁ ရက်၊ နမ့်ခမ်း
ရှမ်းမြောက် မူဆယ်မြို့နယ် နမ့်လောင်းရွာမှာ ရှမ်းတပ်မတော်- SSPP ရဲ့ ပစ်ခတ်မှုကြောင့် နမ့်ခမ်းမြို့နယ်က ဒေသခံတစ်ဦး ထိခိုက်ဒဏ်ရာ ရရှိခဲ့တယ်လို့ ဒေသခံတစ်ဦးက ပြောပါတယ်။
မနေ့ မေလ ၁၀ ရက် မနက် ၇ နာရီဝန်းကျင်က နမ့်လောင်းရွာမှာ အသက် ၃၂ နှစ်အရွယ် ဦးညီထွေးဟာ ဟင်းသီးဟင်းရွက် သွားရှာနေချိန် SSPP က ၎င်းကို သေနတ်နဲ့ ပစ်ခတ်ခဲ့တယ်လို့ ပြောပါတယ်။
“သူက အဲဒီဒေသခံ မဟုတ်ဘူး။ အဲမှာ အလုပ် လာလုပ်တာ။ သူတောထဲမှာ ဟင်းသီးဟင်းရွက် သွားရှာတဲ့အချိန်မှာ SSPP နဲ့ တွေ့တယ်။ ဒေသခံတွေက စစ်သားမြင်ရင် ကြောက်တယ်လေ တောထဲမှာဆိုတော့။ သူတို့ကို တွေ့တဲ့အချိန်မှာ သူကြောက်ပြီး ပြန်လှည့်ဖို့ လုပ်နေတာ။ ပြန်လှည့်ဖို့ လုပ်နေတဲ့အချိန်မှာ SSPP က သူ့ကို ရပ်ခိုင်းလိုက်တယ် သူမရပ်ဘူး။ သူဆက်တိုက် သွားနေတာ။ ပြီးမှ SSPP က သေနတ် ၂ ခါ ပစ်လိုက်တာ။ သူက မရပ်ဘူး ဆက်တိုက် သွားနေတာ နောက်တော့ SSPP ထပ်ပစ်လိုက်တော့ သူ့လက် ထိသွားတယ်”
ပစ်ခတ်ခံရတဲ့ အမျိုးသားဟာ နမ့်ခမ်းမြို့နယ် မန်းပူးရွာမှာ နေထိုင်သူဖြစ်ပြီး လက်ရှိမှာတော့ နမ့်ခမ်း ပြည်သူ့ဆေးရုံမှာ ကုသမှု ခံယူနေတယ်လို့ ၎င်းအမျိုးသားက ဆက်ပြောပါတယ်။
ပစ်ခတ်မှုနဲ့ ပတ်သက်ပြီး SSPP ရဲ့ ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန်ကို ရွှေဖီမြေက စာပို့ကာ ဆက်သွယ်မေးမြန်းထားပေမဲ့ အကြောင်းပြန်တာ မရှိသေးပါဘူး။
