မိုင်းပန်ပျော်၊ မတ်လ ၁၇ ရက်၊ နမ့်ခမ်း
ရှမ်းမြောက် နမ့်ခမ်းမြို့နယ်နဲ့ နမ့်ဖတ်ကာကြားက ၁၃ မိုင်မှာ ဆိုင်ကယ်တစ်စီးက ကားအကြီးကို ကျော်တက်ဖို့ လုပ်နေချိန်မှာပဲ ဆိုင်ကယ်က ကားအောက်ရောက်သွားပြီး ကားကြိတ်မိကြောင့် အမျိုးသား ၁ ဦး သေဆုံးပြီး အမျိုးသမီး ၁ ဦး ဒဏ်ရာရခဲ့တယ်လို့ သိရပါတယ်။
ဖြစ်စဉ်ဟာ ဒီနေ့ မတ်လ ၁၇ ရက် နေ့လယ် ၁ နာရီဝန်းကျင်မှာ ဖြစ်ပွားခဲ့တာ ဖြစ်ပါတယ်။
“သူတို့နှစ်ယောက်က ဆိုင်ကယ်စီးပြီး ခိုမုန်းဘက် မီးသွေးလုပ်တဲ့နေရာကနေ နမ့်ခမ်းဘက်ကို ပြန်လာတာ။ ၁၃ မိုင်မှာ ရောက်တဲ့အချိန် သူတို့နှစ်ယောက် ကားကြီးတစ်စီးကို ကျော်ဖို့လုပ်တာ။ သူတို့နှစ်ယောက် ကားအောက်ရောက်သွားတာ။ ကားဘီးက အဲဒီယောက်ကျားလေးခေါင်းပေါ်ကို တက်ကြိတ်ပြီး ပွဲချင်းပြီးသေတယ်။ သူမိန်းမကတော့ ဒဏ်ရာအပြင်းအထန်ရတယ်”လို့ ဖြစ်စဉ်သိရှိသူတစ်ဦးက ပြောပါတယ်။
ဒဏ်ရာရတဲ့ အမျိုးသမီးကိုတော့ နမ့်ခမ်းဂရုဏာပရဟိတအသင်းက နမ့်ခမ်းဆေးရုံကို ကူညီပို့ဆောင်ပေးခဲ့တယ်လို့ နမ့်ခမ်းဂရုဏာပရဟိတအသင်းမှ တာဝန်ရှိသူတစ်ဦးက ပြောပါတယ်။
သေဆုံးသွားသူ အမျိုးသားဟာ အသက် (၃၄) နှစ်အရွယ် လိုမ်သိန်းအောင်ဆိုသူဖြစ်ပြီး နမ့်ခမ်းမြို့နယ် နမ့်စိတ်ကျေးရွာမှာ နေထိုင်သူဖြစ်တယ်လို့ သိရပါတယ်။
နမ့်ခမ်းနဲ့ နမ့်ဖတ်ကာကြားမှာ လမ်းတွေကျဉ်းတာကြောင့် မကြာခဏကားတွေပိတ်သလို ယာဉ်တိုက်မှုနဲ့ ယာဉ်တိမ်းမှောက်မှုတွေလည်း မကြာခဏ ဖြစ်ပွားနေတယ်လို့ ကားသမားတွေ ပြောပါတယ်။
