အိုက်ပွီး၊ မတ်လ ၃၁ ရက်၊ ကျောက်ဖြူ
ရခိုင်ပြည်နယ် ကျောက်ဖြူမြို့နယ် ဇင်ချောင်းကုန်ဘွေရွာကို စစ်ကောင်စီတပ်က လက်နက်ကြီး ပစ်ခတ်လို့ ရဟန်းတစ်ပါးနဲ့ အရပ်သားတစ်ဦး သေဆုံးပြီး ၇ ဦးထက်မနည်း ထိခိုက်ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။
ဒီနေ့ မတ်လ ၃၁ ရက် မနက် ၉ နာရီခန့်မှာ ကျောက်ဖြူမြို့နယ် ဝါးနက်ချွိန်ရွာအနီး တပ်စွဲထားတဲ့ စစ်ကောင်စီရဲ့ ရေတပ်က ပစ်ခတ်တဲ့ လက်နက်ကြီးကျည်ဟာ ဇင်ချောင်းကုန်ဘွေရွာထဲ ကျပေါက်ကွဲခဲ့တာပဲ ဖြစ်ပါတယ်။
“ရွာထဲကို လက်နက်ကြီးကျည် ၃ လုံး ကျတယ်။ ဘုန်းကြီးကျောင်းဝန်းထဲမှာ ကျတဲ့လက်နက်ကြီးကျည်ကြောင့် ရဟန်းတစ်ပါး ပျံလွန်သွားပြီး နှစ်ပါး ဒဏ်ရာရတယ်။ နောက်လက်နက်ကြီးကျည် နှစ်လုံးက လူနေတဲ့ရပ်ကွက်မှာ ကျတယ်။ အရပ်သားတစ်ဦး သေဆုံးတယ်။ ငါးယောက်လောက်ဒဏ်ရာ ရတယ်” လို့ ဇင်ချောင်းရွာခံအမျိုးသားတစ်ဦးက ရွှေဖီမြေသို့ ပြောပါတယ်။
လက်နက်ကြီးကျည်ကြောင့် ဇင်ချောင်းကုန်ဘွေရွာက သက်တော် ၃၂ နှစ်အရွယ် အရှင်အာဒိစ္စမှာ ပြင်းထန်ဒဏ်ရာနဲ့ ဆေးကုသရင်း ပျံလွန်သွားပြီး အသက် ၃၀ အရွယ် ဦးဘဂျမ်းကတော့ ပွဲချင်းပြီး သေဆုံးခဲ့ပါတယ်။
ဒဏ်ရာ ရရှိသူတွေဟာ ဆရာတော် အရှင်ဇနိတ၊ ကိုရင် ဓမ္မာနဒ္ဒနဲ့ ဦးမောင်ထွန်းမြ၊ ဒေါ်သန်းသန်းအေး၊ ဒေါ်ဖြိုးဖြိုးဝင်း၊ ဒေါ်သိန်းဟန်နု၊ မခင်မြအေးတို့ ဖြစ်ပါတယ်။
“ဒဏ်ရာ ရရှိသူတွေထဲမှာ စစ်ဘေးရှောင်တွေ ပါတယ်။ သူတို့က တခြားကျေးရွာတွေကနေ ဇင်ချောင်းမှာ စစ်ဘေးရှောင်ကြတာ။ အခုဒဏ်ရာရရှိသူတွေကို ဆေးကုသမှုတွေ ပေးနေတယ်။ ဒဏ်ရာ ပြင်းထန်တဲ့ လူနာတွေလည်း ပါတယ်” လို့ ဇင်ချောင်းရွာခံ အမျိုးသားတစ်ဦးက ရွှေဖီမြေသို့ ပြောပါတယ်။
မနေ့ မတ်လ ၃၀ ရက်ကလည်း ကျောက်ဖြူမြို့နယ် ကုလာဘာရွာကို စစ်တပ်က ဒရုန်းနဲ့ လေကြောင်း ဗုံးကြဲတိုက်ခိုက်ခဲ့ပြီး လူနေအိမ်အပါအဝင် ဆိုင်ခန်းတချို့ မီးလောင်ပျက်စီးသွားတယ်လို့ သိရပါတယ်။
