ရဲမာန်၊ စက်တင်ဘာ ၁၅ ရက်၊ မတ္တရာ
မန္တလေးတိုင်း မတ္တရာမြို့နယ် အင်းကြင်းမြိုင်အနီးကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် ဦးဇင်း ၁ပါးနဲ့ အမျိုးသား ၁ဦးတို့ သေဆုံးခဲ့တယ်လို့ ဒေသခံအမျိုးသားတစ်ဦးက ရွှေဖီမြေကိုပြောပါတယ်။
ပြီးခဲ့တဲ့ စက်တင်ဘာ ၁၃ ရက် ည ၇နာရီခန့်မှာ စစ်တပ်က Y-12 လေယာဉ်နဲ့ ဗုံးသီး ၃၁ လုံး ကြဲချတိုက်ခိုက်ခဲ့တာကြောင့် ၂ ဦးသေဆုံးခဲ့တဲ့အပြင် ၄ ဦးလည်း ဒဏ်ရာရရှိခဲ့တယ်လို့ ၎င်းက ဆိုပါတယ်။
“ဆည်တော်၊ အင်ကြင်းမြိုင်နဲ့ ချောင်းသဖာ့ဘုန်းကြီးကျောင်း ၃ နေရာကို ချသွားတာ။ အဲ့မှာ တိုက်ပွဲဖြစ်ပွားတာမရှိဘူး”
အဲတိုက်ခိုက်မှုကြောင့် ဦးဇင်းဝဲကျော်နဲ့ ကိုမောင်လေးတို့ သေဆုံးခဲ့ရပြီး ကိုရင်လေး ၁ ပါး၊ ဆရာလေး ၁ ပါး၊ မငယ်နဲ့ ကိုအောင်ဒင်တို့ကတော့ ဒဏ်ရာရရှိခဲ့တယ်လို့ ၎င်းက ဆက်ပြောပါတယ်။
ပြီးခဲ့တဲ့ စက်တင်ဘာ ၁၀ ရက် ည ၂ နာရီဝန်းကျင်မှာ စစ်တပ်က မတ္တရာမြို့နယ် ဆိပ်သာအုပ်စု ရှားစေးချက်ရွာကို ဗုံးကြဲတိုက်ခိုက်မှုကြောင့် အရပ်သား ၅ ဦးထိခိုက်ဒဏ်ရာရခဲ့တယ်လို့ သိရပါတယ်။
မတ္တရာမြို့နယ်ကို စစ်တပ်က ပြီးခဲ့တဲ့ စက်တင်ဘာ ၁၁ မှာ စစ်ကြောင်းထိုးလာတာကြောင့် မြောင်းသစ်၊ ကျပ်ပြင်၊ မကြီးကုန်း၊ ကင်း၊ ညောင်ပင်သာ၊ ရွာကြီးကုန်းနဲ့ ကျွဲကျရွာစတဲ့ကျေးရွာတွေဟာ စစ်ရှောင်နေပြီး အခြေခံစားသောက်ကုန်နဲ့ ငွေကြေးတချို့လည်း အကူအညီလိုအပ်နေတယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
