လွေးလာဝ်ဇာရ်၊ မေလ ၆ ရက်၊ ဖားကန့်
ကချင်ပြည်နယ် ဖားကန့်မြို့နယ် ဆိုင်တောင်မှာ အမျိုးသားတစ်ဦး ဓားနဲ့ ထိုးသတ်ခံခဲ့ရတယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
မနေ့ မေလ ၅ ရက် နေ့လယ် ၃ နာရီမှာဖြစ်ပွားခဲ့ပြီး ကျောက်လုပ်သူ အချင်းချင်း စကားများပြီး သတ်ဖြတ်မှုတွေ ဖြစ်ပွားခဲ့တာလို့ ဆိုပါတယ်။
ဖြစ်စဉ်သိရှိသူ တစ်ဦးက “ရတနာ အဓိပတိစိုက်ထဲမှာ ဖြစ်ပွားခဲ့တာပါ။ ကျောက်ရှာချိန် ကျောက်ရှာ အချင်းချင်းဖြစ်သွားတာပါ။ နဂိုကတည်းက ရန်ဖြစ်ထားတာလား မသိဘူး။ အငြိုးရှိထားပုံရတယ်လို့ ယူဆပါတယ်။ အုပ်စုလိုက်လည်း မဟုတ်ဘူး။ တစ်ယောက်နဲ့ တစ်ယောက်ထိုးကြတယ်လို့ပြောတယ်။ ဓားနဲ့ အချက်ပေါင်း အများကြီးထိုးခံတာ” လို့ ပြောပါတယ်။
ဓားနဲ့ ထိုးသတ်ခံရသူ အမျိုးသားဟာ ကိုချစ်ကိုကို(၂၂ နှစ်) ဆိုသူဖြစ်ပြီး မန္တလေးတိုင်း တံတားဦးဘက်မှာ နေထိုင်ကြတယ်လို့ အထက်ပါ ဖြစ်စဉ်သိရှိသူက ဆိုပါတယ်။
ဖြစ်စဉ်ဖြစ်ပွားတဲ့ အချိန်မှာ ကိုချစ်ကိုကို ဆိုသူကို လူမှုကူညီရေးအသင်းတွေက ဆေးရုံပို့ဖို့ခေါ်ဆောင်သွားပေမယ့် လမ်းတစ်ဝက်မှာ သေဆုံးသွားတယ်လို့ သိရပါတယ်။
ဖားကန့်မြို့နယ်မှာ စစ်ကောင်စီတပ် အာဏာသိမ်းပြီးနောက်ပိုင်း ခိုးဆိုးလုယက်မှုနဲ့ ဓားထိုးသတ်ဖြတ်ခံရတဲ့ ဖြစ်စဉ်တွေ မကြာခဏ ဖြစ်ပွါးနေပါတယ်။
