ခိုင်လေး၊ မတ်လ ၁၁ ရက်၊ တောင်သာ
မန္တလေးတိုင်း တောင်သာမြို့နယ်မှာ တိုက်ပွဲဖြစ်ပွားတာမရှိဘဲ စစ်ကောင်စီတပ်က အေးကြင်းရွာ ဘုရားဝင်းကို ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦး သေဆုံးခဲ့ပြီး အမျိုးသား ၁ ဦး ပြင်းထန်ဒဏ်ရာ ရခဲ့တယ်လို့ လူထုလှုပ်ရှားမှုကော်မတီ တောင်သာက ဒီနေ့ မတ်လ ၁၁ ရက်မှာ ထုတ်ပြန်လာပါတယ်။
မနေ့ မတ်လ ၁၀ ရက် နေ့လယ် ၃ နာရီ ၂၀ မိနစ်က အေးကြင်းရွာကို တိုက်ပွဲ ဖြစ်ပွားခြင်းမရှိဘဲ စစ်တပ်ဟာ ဘုရားဝင်းအတွင်းက ဓမ္မာရုံကို လေယာဉ်နဲ့ လာရောက် ဗုံးကြဲတိုက်ခိုက်တာလို့ တောင်သာ ဒေသခံတစ်ဦးက ရွှေဖီမြေကို ပြောပါတယ်။
“ပေါင် ဘယ်လောက်လဲတော့ သေချာမသိဘူး။ အဲမှာ အမျိုးသမီးက ပွဲချင်းပြီး သေသွားတယ်။ အမျိုးသားကတော့ ဒဏ်ရာပြင်းထန်တယ်လို့ ကြားတယ်။ ရွာမှာက တိုက်ပွဲ ဖြစ်တာမျိုးတော့ မရှိဘူး။ ပြည်သူတွေကို ပစ်မှတ်ထား တိုက်ခိုက်တာဘဲလို့ မြင်တယ်”
ဒီနေ့မနက် ၂ နာရီဝန်းကျင်ကလည်း မိတ္ထီလာ လေတပ်ကနေ တက်လာတဲ့ စက်တပ်လေထီး ၂ စီး ဇရပ်ကြီးရွာပေါ် ဗုံးသီး ၈ လုံးကြဲချတိုက်ခိုက်ခဲ့တာကြောင့် ဒေသခံတွေရဲ့ နေအိမ်တချို့ ပျက်စီးခဲ့ပြီး လူထိခိုက်တာတော့ မရှိဘူးလို့ လူထုလှုပ်ရှားမှုကော်မတီ တောင်သာက ထုတ်ပြန်ထားပါတယ်။
စစ်တပ်က ဒေသခံတွေ နေထိုင်တဲ့ နေရာတွေကို ဗုံးကြဲတိုက်ခိုက်နိုင်သေးတာကြောင့် ဒေသခံတွေအနေနဲ့ သတိထား နေထိုင်ကြဖို့၊ လေယာဉ်၊ စက်တပ်လေထီးအသံ ကြားပါက လုံးဝ မော့မကြည့်ပဲ ဗုံးခိုကျင်းအတွင်း ပုန်းခိုကြပြီး အသက်ဘေးအန္တရာယ်ကို ကာကွယ်ကြဖို့ တောင်သာမြို့နယ် လူထုလှုပ်ရှားမှု ကော်မတီက အသိပေးထားပါတယ်။
