ယာရူစိင်၊ ဧပြီ ၁၈ ရက်၊ သီပေါ
တအာင်းတပ်မတော် ထိန်းချုပ်ထားတဲ့ သီပေါမြို့နယ် တုံစင့်ရွာမှာ အမျိုးသားတစ်ဦး မိုင်းနင်းမိလို့ ခြေတစ်ဖက် ပြတ်သွားပါတယ်။
ဖြစ်စဉ်ဟာ ပြီးခဲ့တဲ့ ဧပြီ ၁၆ ရက် ညနေ ၆ နာရီဝန်းကျင်မှာ အသက် ၅၀ နှစ်အရွယ် ကိုထွန်းထွန်းဆိုသူက လမ်းပေါ်ကနေ စစ်ကောင်စီရဲ့ တပ်စခန်းဟောင်း ၂၃ ထဲ ငှက် ပစ်ရာကနေ မိုင်းနင်းမိလို့ ဘယ်ခြေထောက် ဆုံးရှုံးခဲ့ရပါတယ်။
“ငှက် လှမ်းပစ်တော့ ငှက် ပြုတ်ကျပြီး ဝင်ကောက်ဖို့ လုပ်တော့ မိုင်းနင်းမိပြီး ခြေထောက် ပြတ်ထွက်သွားတယ်” လို့ သီပေါမြို့အခြေအနေ သိရှိသူတစ်ဦးက ပြောပါတယ်။
လက်ရှိမှာတော့ မိုင်းနင်းမိတဲ့ အမျိုးသားဟာ သီပေါမြို့ ပြည်သူ့ဆေးရုံမှာ ကုသမှု ခံယူနေရပါတယ်။
ပြီးခဲ့တဲ့ မတ်လ ၁၁ ရက်ကလည်း တုံစင့်ရွာက အမျိုးသားတစ်ဦး တောင်ယာ သွားရင်း မိုင်းနင်းမိလို့ သေဆုံးသွားခဲ့ပါတယ်။
