မိုင်းရူပ၊ ဖေဖော်ဝါရီ ၂၄ ရက်၊ သီပေါ
သီပေါမြို့နယ် စံဖိတ်ရွာမှာ အမျိုးသားတစ်ဦးက မိသားစုဝင်ကို ဓားနဲ့ခုတ်လို့ ၂ ဦးသေဆုံးပြီး ၂ ဦး ဒဏ်ရာ ရခဲ့ပါတယ်။
ဒီနေ့ ဖေဖော်ဝါရီ ၂၄ ရက် မနက် ၇ နာရီဝန်းကျင်မှာ စံဖိတ်ရွာက အသက် ၄၀ ဝန်းကျင် စိုင်းမြင့်အောင်ဆိုသူဟာ နေအိမ်ထဲ ၎င်းရဲ့ အမျိုးသမီးဖြစ်သူ နန်းစံဦး၊ ယောက္ခထီးနဲ့ ယောက္ခမကို ဓားနဲ့ ခုတ်သတ်ခဲ့ပြီးနောက် နေအိမ် အနောက်ဘက် ထွက်ပြေးခဲ့ပါတယ်။
အိမ်နောက်ဘက် ထွက်ပြေးသွားချိန် အိမ်နောက်ဘေးရှိ ရေချောင်းကို ဖြတ်ကျော်ပြီး ဝေဖြိုးဆိုသူရဲ့ အိမ်သို့ ရောက်ရှိခဲ့ရာ ဝေဖြိုးကိုလည်း ဓားနဲ့ ထပ်ခုတ်သတ်ခဲ့ရာ ရွာခံတွေက ဝိုင်းဖမ်းခဲ့တယ်လို့ သီပေါဒေသခံတစ်ဦးက ပြောပါတယ်။
“သူ့မိန်းမ နန်းစံဦးကို ဓားနဲ့ ခုတ်တဲ့အချိန်မှာ သူ့မိန်းမ အိမ်အပြင် ပြေးလာပြီး အကူအညီတောင်းတာ။ အဖိုးနဲ့ အဖွားကိုလည်း သူသတ်ပြီးပြီ။ အဲအချိန်မှာ စိုင်းမြင့်အောင် အိမ်နောက်ဘက် ပြေးသွားတယ်။ ဝေဖြိုးအိမ်ကို ရောက်တော့ ဝေဖြိုးကို ထပ်ခုတ်တာ။ ဝေဖြိုး မိန်းမကို ထပ်ခုတ်ဖို့ လုပ်တဲ့အချိန်မှာ သူ့ကို ဝိုင်းဖမ်းလိုက်ကြတာ”
လူသတ်မှု ကျူးလွန်သူ စိုင်းမြင့်အောင်ဆိုသူကို တအာင်းတပ်မတော်- TNLA ရဲ့ ရဲတပ်ဖွဲ့က ဖမ်းဆီးထားပြီး ဘာကြောင့် လူသတ်မှု ကျူးလွန်တာလဲဆိုတာကိုတော့ မသိရသေးပါဘူး။
ပြီးခဲ့တဲ့ ဇန်နဝါရီ ၂၂ ရက်မှာလည်း ရှမ်းမြောက် မိုးမိတ်မြို့နယ် နမ့်ဥမ္မာရွာမှာ အမျိုးသမီးတစ်ဦး သတ်ခံခဲ့ရတဲ့ဖြစ်စဉ် ဖြစ်ပွားခဲ့ဖူးပါတယ်။
