မြတ်နိုး၊ မတ်လ ၂၇ ရက်၊ နမ့်ဖတ်ကာ
ကချင်တပ်မတော် ထိန်းချုပ်ထားတဲ့ ရှမ်းမြောက် ကွတ်ခိုင်မြို့နယ် နမ့်ဖတ်ကာရွာမှာ မနေ့ မတ်လ ၂၆ ရက် နေ့လယ်က သက်ကြီးပိုင်း အမျိုးသားတစ်ဦး စစ်ကျန်မိုင်း နင်းမိပြီး ညာခြေထောက် ပြတ်သွားကြောင်း ဒေသခံတွေဆီက သိရပါတယ်။
“စစ်ကောင်စီတပ်ရဲ့ စခန်းဟောင်း ခလရ ၄၅ စခန်းကုန်းအောက်နားမှာ နင်းမိတာ။ ညာဘက် ခြေထောက် ပြတ်သွားတယ်” လို့ ဒေသခံတစ်ဦးက ပြောပါတယ်။
“အသက် ၆၃ နှစ်ရှိပြီ။ နမ့်ဖတ်ကာ ရပ်ကွက် ၂ ကပါ။ နာမည်က ဦးဂေါ်ဂျားချန်း” လို့ နောက်ထပ် ဒေသခံတစ်ဦးက ပြောပါတယ်။
နမ့်ဖတ်ကာမှာ တိုက်ပွဲ မရှိတော့ပေမဲ့ အန္တရာယ်ရှိနိုင်တဲ့ နေရာတချို့ကိုတော့ တားမြစ်ထားဆဲ ဖြစ်တာကြောင့် သတိထားပြီး သွားလာသင့်တယ်လို့ သူက ပြောပါတယ်။
ဒေသခံတွေက ခြံထဲနဲ့ တောထဲ ဟင်းသီး ဟင်းရွက်ရှာဖို့သွားရင် စစ်ကျန်မိုင်း နင်းမိတာအပြင် ဗုံး ထိမိရာက ပေါက်ကွဲလို့ ထိခိုက်ဒဏ်ရာ ရသူတွေ များတယ်လို့ မိုင်းအန္တရာယ် အသိပညာပေး အကူအညီ ပေးနေသူတစ်ယောက်က ပြောပါတယ်။
ပြီးခဲ့တဲ့ ၂၀၂၄ မတ်လ ၂၂ ရက်ကလည်း နမ့်ဖတ်ကာမှာ အမျိုးသားတစ်ဦး စစ်ကျန်မိုင်း ကောက်ယူ ဖြုတ်ကြည့်ရာကနေ ပေါက်ကွဲပြီး သေဆုံးခဲ့ဖူးပါတယ်။
