ပို့လဘား၊ နိုဝင်ဘာ ၂၉ ရက်၊ မြိုင်
မကွေးတိုင်း မြိုင်မြို့နယ် ညောင်ရွာကျေးရွာက အမျိုးသားတစ်ဦးကို စစ်ကောင်စီတပ်က ဖမ်းဆီးသတ်ဖြတ်ခဲ့တယ်လို့ အညာမြေ အရပ်ဖက်လူမှုကူညီရေးအဖွဲ့မှ တာဝန်ရှိသူတစ်ဦးက ပြောပါတယ်။
ပြီးခဲ့တဲ့ နိုဝင်ဘာလ ၂၇ ရက်မှာ ညောင်ရွာကျေးရွာက အမျိုးသားတစ်ဦးကို စစ်ကောင်စီတပ်က သရက်ကန် ပျူရွာဘက်ကို ဖမ်းဆီးသွားခဲ့ရာ မနေ့ နိုဝင်ဘာလ ၂၈ ရက်နေ့မှာတော့ မြိုင်မြို့နယ် မြေရင့်ရွာနဲ့ နှမ်းဆီကန်ရွာအကြားက တောထဲတစ်နေရာမှာ သတ်ဖြတ်ခဲ့တာလို့ ဆိုပါတယ်။
“သူက တောတိုက်ထဲမှာ စစ်ရှောင်နေတာ။ စစ်ရှောင်နေစဥ်မှာပဲ စစ်ကြောင်းထိုးလာတဲ့ စစ်ကောင်စီနဲ့ တွေ့ပြီး ဖမ်းဆီးခံရခြင်းဖြစ်ပါတယ်။ ဝမ်းဗိုက်မှာ ထိုးသွင်းဒဏ်ရာနှစ်ချက်နဲ့ လည်ပင်းမှာ လှီးဖြတ်ပြီး ရက်ရက်စက်စက်သတ်ဖြတ်ထားတာကို တွေ့ရှိခဲ့ရတာပဲ ဖြစ်ပါတယ်။ သူ့အလောင်းကို ကျနော်တို့ ဒီမနက်မှာပဲ တွေ့တာ အလောင်းက မပုပ်ပွသေးဘူး။ တောင့်အေးနေတာပဲ ရှိတယ်” လို့ အညာမြေအရပ်ဖက်လူမှုကူညီရေးအဖွဲ့မှ တာဝန်ရှိသူတစ်ဦးက ပြောပါတယ်။
သတ်ဖြတ်ခံရသူ အမျိုးသားဟာ အသက် ၃၃ နှစ်အရွယ်ရှိတဲ့ ကိုငသိန်းဆိုသူ ဖြစ် ပါတယ်။
မြိုင်မြို့နယ် စက်မှုစုန် ၂ ကို ပြီးခဲ့တဲ့ နိုဝင်ဘာ ၁၁ ရက်က စစ်ကြောင်းထိုးလာတဲ့ စစ်ကောင်စီတပ်ဟာ ဝက်ပုတ်ကျေးရွာအနီးရှိ ရွာတန်းရှည်ကျေးရွာက အမျိုးသားတစ်ဦးနဲ့ အမျိုးသမီးတစ်ဦးကို သတ်ဖြတ်ခဲ့တယ်လို့ သိရပါတယ်။
ပြီးခဲ့တဲ့ နိုဝင်ဘာလ ၃ ရက်ကစပြီး မြိုင်မြို့နယ်ထဲကို စစ်ကောင်စီတပ်က စစ်ကြောင်းထိုးလာပြီး ဒေသတွင်းရှိ ကျေးရွာတွေကို မီးရှို့ဖျက်ဆီးခဲ့တဲ့အပြင် ဒေသခံတွေကိုလည်း သတ်ဖြတ်ခဲ့တာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
