ပို့လဘား၊ မေလ ၃၁ ရက်၊ နမ့်ခမ်း
တအာင်းတပ်မတော် TNLA ထိန်းချုပ်ထားတဲ့ ရှမ်းမြောက် နမ့်ခမ်းမြို့နယ်က အမျိုးသားတစ်ဦး မိုင်းနင်းမိပြီး ခြေထောက်တစ်ဖက် ပြတ်ခဲ့ရတယ်လို့ ဒေသခံတစ်ဦးက ရွှေဖီမြေကို ပြောပါတယ်။
မေလ ၂၉ ရက် မနက် ၈ နာရီမှာ နမ့်ခမ်းမြို့နယ် ကောင်ဝိုင်းကျေးရွာက အသက် ၃၈ နှစ်အရွယ်ရှိတဲ့ ဦးထွန်းလှဆိုသူက မှိုသွားကောက်ရာကနေ မိုင်းနင်းမိခဲ့တာဖြစ်ပါတယ်။
“သူ စယ်လန့်ရွာဘက်မှာ မီးသွေးဖုတ်တာပေါ့နော်။ သူ မီးသွေးသွားပိတ်တဲ့အချိန်မှာ မှိုတွေ့လို့ မှိုကောက်တဲ့အချိန်မှာပဲ နင်းမိတာ။ အဲရွာကလူတွေက သူ့မိန်းမကို အကြောင်းကြားလာလို့ သိရတယ်။ အခု သူနမ့်ခမ်းဆေးရုံမှာ ဆေးကုသနေတယ်”လို့ ဒေသခံအမျိုးသားတစ်ဦးက ပြောပါတယ်။
အဲဒီမိုင်း ပေါက်ကွဲမှုကြောင့် ဦးထွန်းလှရဲ့ ညာဖက်ခြေထောက် ပြတ်ထွက်သွားပြီး ၎င်းရဲ့ ခန္ဓာကိုယ်တွေပေါ်မှာလည်း ထိခိုက်ဒဏ်ရာ ရရှိခဲ့တယ်လို့ ဆိုပါတယ်။
ပြီးခဲ့တဲ့ မေလ ၁၅ ရက်ကလည်း မူဆယ်မြို့နယ် တုန်ခန်ကျေးရွာက အသက် ၄၀ အရွယ် အမျိုးသားတစ်ဦး နွားထွက်ကျောင်းနေစဉ် မြေမြှုပ်မိုင်းကို ဖိမိပြီး ပွဲချင်းပြီး သေဆုံးသွားခဲ့ပါတယ်။
ဇန်နဝါရီလကနေ ဧပြီလအထိ ရွှေဖီမြေ ပြုစုရရှိထားတဲ့စာရင်းအရ ရှမ်းမြောက် နမ့်ဆန်၊ ကျောက်မဲ၊ သီပေါ၊ မိုးမိတ် စတဲ့မြို့နယ်တွေမှာ မြေမြှုပ်မိုင်းနဲ့ စစ်လက်နက် အကြွင်းအကျန်ကြောင့် ကလေးအပါအဝင် အရပ်သား ၁၅ ဦး သေဆုံးပြီး ၂၉ ဦး ထိခိုက်ဒဏ်ရာရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
