လွေးဇွန်မိုး၊ ဇန်နဝါရီ ၁၀ ရက်၊ မိုင်းကိုင်
ရှမ်းတောင် မိုင်းကိုင်မြို့နယ် ပန်ကေတုကျေးရွာက အသက် ၄၂ နှစ်ဝန်းကျင်အရွယ် ခတ္တိယျဆိုသူကို ရှမ်းပြည်တပ်မတော်- SSPP/SSA က ပစ်သတ်ခဲ့တယ်လို့ ဒေသခံတွေဆီက စုံစမ်းသိရှိရပါတယ်။
ပြီးခဲ့တဲ့ ဇန်နဝါရီ ၆ ရက်က မောက်လျန်ရွာအနီးမှာ ပေါက်ကွဲမှု ဖြစ်ပြီးနောက် ခြံထဲ ရှိနေတဲ့ ခတ္တယျဆိုသူက ကြောက်လန့်ပြီး ထွက်ပြေးတာကြောင့် SSPP က လိုက်လံ ပစ်ခတ်ရာ ထိမှန်သေဆုံးသွားတာလို့ ဖြစ်စဥ်သိရှိသူ အမျိုးသားတစ်ဦးက ပြောပါတယ်။
“သူက ပြောင်းဖူးခြံထဲ နေတာ။ မိုင်းပေါက်ကွဲတော့ ထိတ်လန့်ပြီး ပြေးတော့ အစိမ်းတွေ(SSPP) သူ့ကို သေနတ်နဲ့ လှမ်းပစ်တယ်။ ဘယ်နှစ်ချက် မှန်လဲတော့ မသိဘူး။ အဲတစ်ယောက်က သေသွားတာ”
အဲဒီအမျိုးသားကို ပန်ကေတုရွာမှာ တာဝန်ကျတဲ့ SSPP တပ်မှ စိုင်းမိန်းဆိုသူနဲ့ ၎င်းရဲ့ လက်အောက်ခံ တပ်သားတွေက ပစ်သတ်ခဲ့တာလို့ အထက်ပါ အမျိုးသားက ဆက်ပြောပါတယ်။
“သူ့ရဲ့ မိသားစုဝင်ေတွ သိပါပြီ။ ဘာမှ မတတ်နိုင်ဘူး။ ဘာမှမတတ်နိုင်တဲ့အပြင် နှုတ်ပိတ်နေရတဲ့ သဘောမျိုး။ ပန်ကေတုမှာ တာဝန်ကျတဲ့ သူတို့ခေါင်းဆောင်နာမည်က စိုင်းမိန်းတဲ့ ရာထူးတော့ မသိဘူး”
အဲဒီအမျိုးသား ပစ်သတ်ခံရတာနဲ့ ပတ်သက်ပြီး အသေးစိတ်အချက်အလက် သိရဖို့ SSPP ရဲ့ ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန်ကို ရွှေဖီမြေက ဖုန်းနဲ့ ၂ ကြိမ် ဆက်သွယ်ခဲ့ပေမဲ့ ဖုန်းလက်ခံဖြေကြားတာ မရှိပါဘူး။
မောက်လျန်ရွာအနီးမှာ ဖြစ်ပွားခဲ့တဲ့ ပေါက်ကွဲမှုကြောင့် မောက်လျန်ရွာက အမျိုးသား ၉ ဦးကို SSPP က ဖမ်းဆီးသွားခဲ့ပြီး ၈ ဦးကို ပြန်လွှတ်ပေးခဲ့ပေမဲ့ တစ်ဦးကိုတော့ လက်ရှိအချိန်ထိ ဖမ်းဆီးထားဆဲ ဖြစ်ပါတယ်။
ပြီးခဲ့တဲ့ ၂၀၂၃ ခုနှစ် မေလ ၁၉ ရက်မှာလည်း တောထဲ ကျွဲ သွားကျောင်းနေတဲ့ မိုင်းကိုင်မြို့နယ် လွယ်ယန်းရွာက အသက် ၅၀ အရွယ် ကွီထွေးကို SSPP က ပစ်သတ်လို့ သေဆုံးသွားတဲ့ဖြစ်စဉ်လည်း ရှိပါတယ်။
