လွေးလာဝ်ဇာရ်၊ ဖေဖော်ဝါရီ ၆ ရက်၊ ရပ်စောက်
ရှမ်းတောင် ရပ်စောက်မြို့နယ် အင်းတောမြို့က အမျိုးသားတစ်ဦးကို ရှမ်းပြည်တိုးတက်ရေးပါတီ- SSPP က ဖမ်းဆီးရိုက်နှက်လို့ သေဆုံးသွားခဲ့တယ်လို့ နီးစပ်သူတွေက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၂ ရက် ည ၈ နာရီခွဲဝန်းကျင်မှာ သူငယ်ချင်းအိမ် သွားလည်ပြီးအပြန်မှာ ဖမ်းဆီးရိုက်နှက်ခံခဲ့ရတာလို့ သေဆုံးသူ အမျိုးသားနဲ့ နီးစပ်တဲ့ အမျိုးသားတစ်ဦးက ပြောပါတယ်။
“သူငယ်ချင်းအိမ် လည်ပြီးအပြန်မှာ SSPP ဖမ်းဆီးခေါ်ဆောင်သွားပြီး ရိုက်နှက်တာ။ သေလုခါနီးမှ အိမ်ကို ဖုန်းဆက်ပြီး ပြန်လာခေါ်ခိုင်းတာ”
ပြီးခဲ့တဲ့ ဖေဖော်ဝါရီ ၄ ရက်မှာ အဲဒီအမျိုးသားကို မိသားစုဝင်က ခေါ်ယူပြီး ဆေးရုံသို့ ပို့ဆောင်ပေးခဲ့ပေမဲ့ ပြင်းထန်တဲ့ ဒဏ်ရာကြောင့် နောက်တစ်ရက် ဖေဖော်ဝါရီ ၅ ရက် မနက် ၉ နာရီခွဲမှာ သေဆုံးသွားခဲ့ပါတယ်။
အဆိုပါကိစ္စနဲ့ ပတ်သက်ပြီး တုန့်ပြန်ချက်ရဖို့ SSPP ရဲ့ ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ကို ဖုန်းအပြင် စာပို့ကာ ဆက်သွယ်ပေမဲ့ အဆက်အသွယ် မရခဲ့ပါဘူး။
ရှမ်းတောင်မှာ SSPP နဲ့ ရှမ်းပြည်ပြန်လည်ထူထောင်ရေးကောင်စီ- RCSS တို့အကြား မကြာခဏ အပြန်အလှန် ဖမ်းဆီးတာ၊ မိုင်းဆွဲတိုက်ခိုက်တာ ပြုလုပ်လေ့ရှိပြီး အခုလို ပြုလုပ်တာကြောင့် အရပ်သားထိခိုက်သေဆုံးတာလည်း မကြာခဏ ဖြစ်ပွားနေပါတယ်။
