မိုင်းရူပ၊ မေလ ၃ဝ ရက်၊ မိုးကုတ်
တအာင်းတပ်မတော် PSLF/TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့နယ် လယ်ဦးကျေးရွာမှာ အမျိုးသားတစ်ဦး မိုင်းနင်းမိပြီး ပွဲချင်းပြီး သေဆုံးသွားတယ်လို့ တအာင်းတပ်က မနေ့ မေလ ၂၉ ရက်မှာ သတင်းထုတ်ပြန်ပါတယ်။
လယ်ဦးရွာခံ အသက် ၂၅ နှစ်အရွယ် မိုင်းအောင်အောင်ဆိုသူက ပြီးခဲ့တဲ့ မေလ ၂၄ ရက်မှာ အရင်က စစ်ကောင်စီတပ်ရဲ့ မိုးကုတ်ဗျူဟာ လက်အောက်ခံတပ်ရင်း (၁၄၈) တပ်စခန်းဟောင်း ၅ မိုင်ဂိတ်ရှေ့မှာ မိုင်းနင်းခဲ့တာ ဖြစ်ပါတယ်။
သေဆုံးသူ မိုင်းအောင်အောင်ဟာ ညာခြေထောက် တစ်ဖက်ပြတ်သွားတာနဲ့ ဘယ်ခြေထောက်မှာ ပြင်းထန်တဲ့ဒဏ်ရာရရှိတာကြောင် သေဆုံးသွားခဲ့တာလို့ ဆိုပါတယ်။
“မိုင်းနင်းမိတဲ့ အောင်အောင်က ဘိန်းစား။ ဖမ်းခံရပြီး ပြန်လွှတ်လာတာ မကြာသေးဘူး။ သူက လျှောက်သွားနေတာ။ မိုင်းနင်းပြီး သေသွားတယ်”လို့ ဖြစ်စဥ်ကို သိရှိထားသူတစ်ဦးက ရွှေဖီမြေကို ပြောပါတယ်။
ရှမ်းမြောက်ရှိ တိုင်းရင်းသားလက်နက်ကိုင်တပ်တွေ ထိန်းချုပ်ထားတဲ့ ဒေသတွေမှာ တိုက်ပွဲတွေ မရှိတော့ပေမဲ့ မြေမြှုပ်မိုင်းနဲ့ လက်နက်အကြွင်းအကျန်တွေကြောင့် အရပ်သားသေဆုံးမှုတွေ ဖြစ်ပွားနေပါတယ်။
ပြီးခဲ့တဲ့ မေလ ၁၅ ရက်မှာလည်း ရှမ်းမြောက် မူဆယ်မြို့နယ် တုန်ခန်ကျေးရွာက အသက် ၄ဝ အရွယ် အမျိုးသားတစ်ဦး နွားကျောင်းနေချိန် ညာဘက်လက်နဲ့ မြေမြှုပ်မိုင်းကို ဖိမိပြီး ပွဲချင်းပြီး သေဆုံးသွားခဲ့ပါတယ်။
ရွှေဖီမြေက ပြုစုထားတဲ့ စာရင်းအရ နမ့်ဆန်၊ ကျောက်မဲ၊ သီပေါ၊ မိုးမိတ် စတဲ့မြို့နယ်တွေမှာ ဇန်နဝါရီလကနေ ဧပြီလအထိ မြေမြှုပ်မိုင်းနဲ့ စစ်လက်နက် အကြွင်းအကျန်ကြောင့် ကလေးအပါအဝင် အရပ်သား ၁၅ ဦး သေဆုံးပြီး ၂၉ ဦး ထိခိုက်ဒဏ်ရာ ရခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
