မိုင်းပန်ပျော်၊ ဖေဖော်ဝါရီ ၁၇ ရက်၊ နမ့်ဆန်
တအာင်းဒေသ နမ့်ဆန်မြို့နယ် မန်လွယ်ကျေးရွာမှာ မြေတူးကားတစ်စီး တိမ်းမှောက်ပြီး အမျိုးသားတစ်ဦး သေဆုံးသွားပါတယ်။
ဖြစ်စဉ်က ပြီးခဲ့တဲ့ ဖေဖော်ဝါရီ ၁၅ ရက် မနက် ၉ နာရီမှာ နမ့်ဆန်မြို့နယ် အထက်မန်လွယ်ရွာမှာ မြေတူးကားက လမ်းဖောက်နေတဲ့အချိန် ဘရိတ် ပျက်ပြီး တိမ်းမှောက်မှု ဖြစ်ပွားရာကနေ သေဆုံးခဲ့တာလို့ ဖြစ်စဉ်သိရှိသူ အမျိုးသမီးတစ်ဦးက ရွှေဖီမြေကို ပြောပါတယ်။
“သူက လမ်းဖောက်နေရင်းနဲ့ သူ့ကားက ဘရိတ်က မမိတော့တာ ဘရိတ် မမိတော့ သူအက်စီးဒန့် ဖြစ်သွားတာ။ ပြီးတော့ သူ ခုန်ဆင်းလိုက်တဲ့အချိန်မှာ မလွတ်ဘဲနဲ့ ကားဘီးအောက် ရောက်သွားတာ အဲ့ဒီကားက သူ့ကိုပါ ကြိတ်သွားတာ”
တိမ်းမှောက်မှု ဖြစ်ပွားပြီး သေဆုံးခဲ့တဲ့အမျိုးသားဟာ အသက် ၄၀ ခန့်အရွယ် ကိုဝင်းထွဋ်ဆိုသူ ဖြစ်ပြီးတော့ နမ့်ဆန်မြို့နယ်ထဲ လမ်းတွေ ဖောက်ပေးနေသူ ဖြစ်တယ်လို့ ဆိုပါတယ်။
ကိုဝင်းထွဋ်ရဲ့အလောင်းကို ဇနီးဖြစ်သူနဲ့ အထက်မန်လွယ်က ရွာခံတွေ သွားရောက် သယ်ဆောင်ပြီး သဂြိုလ်ပေးခဲ့တယ်လို့ သူမက ဆက်ပြောပါတယ်။
