ပို့လဘား၊ ဧပြီ ၂၁ ရက်၊ မိုင်းယော်
ရှမ်းမြောက် လားရှိုးခရိုင် မိုင်းယော်တိုက်နယ် နမ့်မောကျေးရွာအုပ်စု မိုင်းလင်းရွာက အမျိုးသားတစ်ဦးကို ကိုးကန့်တပ်မတော်- MNDAA က သေတဲ့အထိ ရိုက်နှက်ခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
ဖြစ်စဉ်ဟာ ပြီးခဲ့တဲ့ ဧပြီ ၁၈ ရက် ည ၇ နာရီမှာ အသက် ၂၅ နှစ်အရွယ် မိုင်းအိုက်မန်ဆိုသူကို ကျွဲ ခိုးရောင်းတဲ့အမှုနဲ့ MNDAA ကဖမ်းဆီးသွားတာလို့ ဆိုပါတယ်။
“၂ လပိုင်းက တရုတ်ဘွားတော်တစ်ယောက်က သူ့(မိုင်းအိုက်မန်)အိမ်ကို လာပြီး ပြောတယ်။ ကျွဲက မလှဘူး။ လှတဲ့ကျွဲ တွေ့ရင် ကျမ ကျွဲနဲ့ လဲပေးအုံးတဲ့။ မတွေ့ရင်လည်း အဲကျွဲ ရောင်းလိုက်တဲ့။ လှတဲ့တစ်ကောင် ကောင်းတဲ့တစ်ကောင် ဝယ်ပေးပေါ့။ အိုက်မန်ဆီ ကျွဲကို ထားခဲ့တယ်။ တရုတ် ဘွားတော်က သူ့ကို ကျွဲရောင်းခိုင်းထားတာ။ အဲဘွားတော်ယောကျာ်းက မိုင်းအိုက်မန်ကို ဆိုင်မှာ ဘီယာ ထိုင်သောက်မယ်ဆိုပြီး ခေါ်လာတဲ့အချိန်မှာ ကိုးကန့်စစ်သားတွေက သူ့ကို လက်ထိပ်နဲ့ လာခတ်တာ။ တရုတ်ဘွားတော်ရဲ့ယောကျာ်းက သူ့ကိုပြောနေတာ ကိုးကန့်တွေဆီ တင်ပြထားပြီတဲ့။ မပြောမဆို ကျွဲ ခိုးရောင်းနေတာဆိုပြီး စွပ်စွဲပြီး ဖမ်းခိုင်းသွားတာ”
မိုင်းအိုက်မန်ဟာ ဧပြီ ၁၉ ရက်က သေဆုံးသွားတဲ့အကြောင်းကို MNDAA တပ်သားတစ်ဦးက ၎င်းရဲ့ မိသားစုဝင်ဆီအကြောင်းကြားလာတာလို့ ပြောပါတယ်။
“သူတို့ခေါ်သွားပြီး နောက်တစ်ရက်မှာ သူသေတဲ့အကြောင်း သူ့မိသားစုဝင်ဆီအကြောင်းလာကြားတာ။ သူတို့ပြောတာ သူ့ကို ဘာမှမလုပ်ဘူးတဲ့။ သူ့ကိုယ်လုံးမှာတော့ သူတို့ရိုက်တဲ့ ဒဏ်ရာတွေပဲ”
ကျွဲဟာ တရုတ်ဘွားတော်က မိုင်းအိုက်မန်ကို ပြီးခဲ့တဲ့ ဖေဖော်ဝါရီလကတည်းက ရောင်းခိုင်းခဲ့ပေမဲ့ လက်ရှိမှာတော့ အဲဒီတရုတ်ဘွားတော်က တာဝန်ခံခြင်းမရှိဘူးလို့ ဆိုပါတယ်။
အဆိုပါကိစ္စနဲ့ပတ်သက်ပြီး သေဆုံးသူမိသားစုဝင်က တရားမျှတမှုရဖို့ မျှော်လင့်နေပြီး ကိုးကန့်တပ်ဘက်က တစ်စုံတစ်ရာလာရောက် ပြောဆိုတာမျိုး မရှိသေးပါဘူး။
