လွေးဇွန်မိုး၊ ဧပြီ ၃၀ ရက်၊ တန့်ယန်း
စစ်ကောင်စီတပ် အုပ်ချုပ်နေဆဲဖြစ်တဲ့ ရှမ်းမြောက် တန့်ယန်းမြို့ ရပ်ကွက် ၂ က အိမ်ခန်းငှားတဲ့ နေရာတစ်ခုမှာ ပေါက်ကွဲမှုဖြစ်ပြီး ဒေသခံ အမျိုးသား ၃ ဦး ထိမှန်ဒဏ်ရာရခဲ့တယ်လို့ ဒေသခံတွေစီက သိရပါတယ်။
ဒီနေ့ ဧပြီ ၃၀ ရက် နေ့လည် ၁၂ နာရီခွဲဝန်းကျင်မှာ ရပ်ကွက် ၂ မှာ ပေါက်ကွဲမှုဖြစ်ပြီး အိမ်ခန်းငှားနေတဲ့အလုပ်သမား ၃ ဦး ဒဏ်ရာရခဲ့တဲ့အပြင် အိမ်ခန်း ၃ ခန်းလည်း ပျက်စီးခဲ့တယ်လို့ ဖြစ်စဥ်သိရှိသူ အမျိုးသားတစ်ဦးက ပြောပါတယ်။
“သူတို့က ငါးမိုင်းခွဲတဲ့ ယမ်းတွေ ဘာတွေ လှောင်ထားတာကနေ ဖြစ်တာလို့တော့ အကြမ်းဖျင်းသိရတယ်။ ဗီဒီယိုထဲက ဖုန်တွေလူးနေတဲ့သူတွေ အဆောက်အဦးပြိုလို့ ဖုန်တွေလူးနေတာ။ မိုင်းထိတာ မဟုတ်ဘူး။ အခုဖြစ်နေရာမှာ ဦးလေးတို့သွားကြည့်တဲ့အချိန် အဲအိမ်မှာ ရှမ်းအဖွဲ့ ဦးထုတ်တွေချိတ်ထားတာလည်း တွေ့ရတယ်”
သိုလှောင်ထားတဲ့ ယမ်းတွေကနေတစ်ဆင့် ပေါက်ကွဲမှုဖြစ်ခဲ့တယ်လို့ ဒေသခံတွေက ပြောဆိုပေမဲ့ ရွှေဖီမြေက သီးခြားအတည်မပြုနိုင်သေးပဲ ဆက်လက်စုံစမ်းနေဆဲဖြစ်ပါတယ်။
လက်ရှိမှာ ဒဏ်ရာရထားတဲ့ လူတွေကိုတော့ တန့်ယန်းပြည်သူ့ဆေးရုံကို ပို့ဆောင်ထားပြီး ဒဏ်ရာရထားတဲ့သူတွေရဲ့ အချက်အလက်အသေးစိတ်ကိုတော့ မသိရသေးပါဘူး။
တန့်ယန်းမြို့နယ်ဟာ ရှမ်းပြည်တိုးတက်ရေးပါတီ SSPP၊ ဝ ပြည်သွေးစည်းညီညွတ်ရေးတပ်မတော် UWSA နဲ့ စစ်ကောင်စီတပ်တို့ သွားလာလှုပ်ရှားတဲ့ နယ်မြေဖြစ်ပါတယ်။
