ပျားကြီး၊ ဖေဖော်ဝါရီ ၁၆ ရက်၊ ရန်ကုန်
ရန်ကုန်တိုင်း လှိုင်မြို့နယ် အင်းစိန်လမ်းမပေါ်က ဘာဒါဈေးကြီးမှာ မီးအကြီးအကျယ် လောင်ကျွမ်းမှု ဖြစ်ပွားခဲ့တယ်လို့ ဒေသခံတွေက ပြောပါတယ်။
မနေ့ ဖေဖော်ဝါရီ ၁၅ ရက် ညသန်းခေါင် ၁၂ နာရီဝန်းကျင်မှာ ဘာဒါဈေးအတွင်းပိုင်းကစပြီး မီးလောင်ကျွမ်းခဲ့ရာ ဆိုင်ခန်း စုစုပေါင်းရဲ့ ၅၀ ရာခိုင်နှုန်းကျော် ပျက်စီးခဲ့ပါတယ်။
“ဈေးအလယ်လောက်ကစပြီး လောင်တာ ပေါက်ကွဲတာတွေလည်း ရှိတော့ တစ်ဆိုင်နဲ့တစ်ဆိုင် ကူးတာ အရမ်းမြန်တယ်။ ကောင်းကင်တစ်ခုလုံးကို နီရဲနေတာပဲ။ အတော်များများ ပျက်စီးတော့ ဆုံးရှုံးမှု အရမ်းများမှာ” လို့ လှိုင်မြို့နယ်မှာ နေထိုင်သူတစ်ဦးက ပြောပါတယ်။
ဘာဒါဈေးကြီးမှာ ဈေးရုံပေါင်း ၁၅ ရုံရှိပြီး အခုလို မီးလောင်ကျွမ်းမှုကြောင့် ဈေးရုံပေါင်း ၉ ရုံမှာရှိတဲ့ ဆိုင်ခန်းပေါင်း ၄၀၀ နီးပါး ပျက်စီးခဲ့တယ်လို့ ကူညီကယ်ဆယ်ရေး လုပ်ပေးနေတဲ့ ပရဟိတ အသင်းသားတစ်ဦးက ပြောပါတယ်။
Level 2 အဆင့် သတ်မှတ်ခဲ့ရသလို ၁ နာရီကျော်ကြာ မီးငြှိမ်းသတ်ခဲ့ရတဲ့ ဘာဒါဈေးကြီး မီးလောင်မှုမှာ မီးစတင်လောင်ကျွမ်းရတဲ့ အကြောင်းအရင်းကိုတော့ ရှင်းရှင်းလင်းလင်း မသိရသေးပါဘူး။
“စဖြစ်တဲ့အချိန်က တစ်မြို့နယ်လုံးလိုလို မီးပျက်နေတဲ့အချိန်ဗျ။ ဝါယာရှော့ မဟုတ်တာ သေချာတယ်။ ဈေးရုံတွေ ပိတ်ထားတဲ့အချိန် ညသန်းခေါင်ကြီး ဈေးလယ်က စလောင်တာက စဉ်းစားစရာပဲ” လို့ မျက်မြင်တွေ့သူ ဒေသခံတစ်ဦးက ပြောပါတယ်။
အလားတူ ဖေဖော်ဝါရီ ၁၄ ရက် မနက် ၄ နာရီခန့်ကလည်း မြောက်ဥက္ကလာပမြို့နယ် အောင်မင်္ဂလာ အဝေးပြေးကားဝင်းအနီးက သီရိရတနာဈေးမှာ မီးလောင်မှု ဖြစ်ပွားခဲ့ပြီး ဖေဖော်ဝါရီ ၁၅ ရက် နေ့လယ် ၁၂ နာရီခန့်က သင်္ဃန်းကွန်းမြို့နယ် သုမင်္ဂလာအိမ်ရာမှာလည်း မီးလောင်ကျွမ်းမှု ဖြစ်ပွားခဲ့တယ်လို့ ဒေသခံတွေက ပြောဆိုပါတယ်။
