လွေးလာဝ်ဇာရ်၊ မတ်လ ၁၂ ရက်၊ နမ့်ခမ်း
TNLA ထိန်းချုပ်ထားတဲ့ ရှမ်းမြောက် နမ့်ခမ်းမြို့နယ် ပန်ဟန်ကြီးကျေးရွာအုပ်စု ဖပြန်(ဖဖဲန်)ရွာမှာ ဘတ္ထရီအိုးတစ်လုံး ပေါက်ကွဲမှု ဖြစ်ပွားရာကနေ နေအိမ်တစ်လုံး မီးလောင်ပြာကျခဲ့တယ်လို့ သိရပါတယ်။
မတ်လ ၁၀ ရက် မနက် ၉ နာရီဝန်းကျင်မှာ ဘတ္ထရီးအိုးတစ်လုံးကို ဆိုလာပြားနဲ့ အားသွင်းထားရာကနေ ပေါက်ကွဲမှု ဖြစ်ပွားခဲ့တာဖြစ်ပါတယ်။
ဖြစ်စဉ်သိရှိသူ အမျိုးသားတစ်ဦးက “ငါတို့ဘက်ကျတော့ တော်တော်များများက ဘတ္ထရီ သွင်းထားတာ။ အဲကနေ ပေါက်ကွဲမှု ဖြစ်တာ။ ဘာလို့ဆိုတော့ ဆိုလာက ဘတ္ထရီထက် ကြီးလို့လေ။ ရွာဘက် အများစုက စရိတ်သက်သာအောင်ဆိုပြီး ဆိုင်ကယ်ဘတ္ထရီကိုဝယ်ပြီး ဆိုလာနဲ့ သွင်းကြတယ်။ တစ်နေကုန် သွင်းတော့ ပူပြီး ပေါက်တာပေါ့။ ဆန်စပါးတွေလည်း မီးထဲ ပါသွားကုန်ပြီ” လို့ ပြောပါတယ်။
မီးလောင်ပြာကျသွားတဲ့ အဲဒီနေအိမ်ဟာ မိသားစုနှစ်စု နေထိုင်ကြတယ်လို့ အထက်ပါအမျိုးသားက ဆက်ပြောပါတယ်။
ငွေခါးကွင်း ၁ ကွင်း၊ ဆွဲကြိုး ၂ ကွင်း၊ ထင်းဖြတ်စက် ၂ လုံးနဲ့ ဆန်စပါးအပါအဝင် စုစုပေါင်း မီးလောင်ဆုံးရှုံးသွားတဲ့ တန်ဖိုးဟာ ကျပ်သိန်းပေါင်း ၁၀၀ ကျော် ရှိတယ်လို့ TNLA ရဲ့ ထုတ်ပြန်ချက်အရ သိရပါတယ်။
နွေရာသီမှာ အပူချိန်မြင့်ပြီး မီးလောင်မှု ဖြစ်ပွားစေနိုင်တာကြောင့် သက်ဆိုင်ရာ အဖွဲ့အစည်းတွေအနေနဲ့ ကျေးရွာပိုင်း ကွင်းဆင်းပြီး ဒေသခံလူထုတွေကို အသိပညာပေး လုပ်ပေးစေချင်တယ်လို့ ဒေသခံတွေက ပြောဆိုပါတယ်။
ပြီးခဲ့တဲ့ ဇန်နဝါရီ ၉ ရက်မှာလည်း နမ့်ခမ်းမြို့နယ် နမ့်စိတ်ရွာမှာ ဝိုင်ယာကြိုး ရှော့လ်ဖြစ်ရာကနေ နေအိမ်တစ်လုံး မီးလောင်ဆုံးရှုံးခဲ့ပြီး မီးလောင်မှုဟာ တအာင်းဒေသဖြစ်တဲ့ နမ့်ဆန်၊ နမ့်ခမ်းနဲ့ နမ္မတူမြို့နယ်မှာ မကြာခဏ ဖြစ်ပွားနေပါတယ်။
