ယာရူစိင်း၊ ဇန်နဝါရီ ၁၅ ရက်၊ နမ့်ခမ်း
တအာင်းတပ်မတော်- PSLF/TNLA ထိန်းချုပ်ထားတဲ့ နမ့်ခမ်းမြို့နယ် နမ့်စိတ်ကျေးရွာမှာ ဝိုင်ယာကြိုး ရှော့လ်ဖြစ်ရာကနေတဆင့် နေအိမ်တစ်လုံး မီးလောင်ဆုံးရှုံးခဲ့ပါတယ်။
ဖြစ်စဉ်ဟာ ပြီးခဲ့တဲ့ ဇန်နဝါရီ ၉ ရက် နေ့လယ် ၂ နာရီေကျာ်မှာ အိမ်ရှင် ဦးအိုက်ကီဆိုသူဟာ အသုဘသို့ သွားနေစဉ် ဝိုင်ယာကြိုး ရှော့လ်ဖြစ်ကာ နေအိမ် မီးလောင်ခဲ့တာလို့ ဖြစ်စဉ်သိရှိသူ အမျိုးသမီးတစ်ဦးက ရွှေဖီမြေကို ပြောပါတယ်။
“သူတို့အိမ်ကို သွားရောက်တဲ့အခါမှာ အိမ်အကုန်မီးလောင်နေပြီ ဘာမှမရှိတော့ဘူး။ အဲနေ့က သူတို့အမျိုးအိမ်က အသုဘရှိတော့ သူတို့အကုန်သွားတယ်။ ပဌာန်းပွဲနဲ့လည်း တိုက်တော့လေ သူတို့အိမ်မှာ ဘယ်သူမှ မရှိဘူး။ သူတို့အိမ်ဘေးပတ်ဝန်းကျင်မှာလည်း ဘယ်သူမှ မရှိတော့ ပြန်လာတဲ့အချိန်မှာ အိမ်က ဘာမှမကျန်တော့ဘူး”
နေအိမ်အတွင်း ဆုံးရှုံးမှုဟာ အသုံးအဆောင်ပစ္စည်း၊ ဖုန်းတစ်လုံးနဲ့ ဆန်စပါးအပါအဝင် သိန်း ၅၀ ကျော် မီးလောင်ဆုံးရှုံးခဲ့ကြောင်း သိရပါတယ်။
မီးလောင်ရာနေရာသို့ PSLF/TNLA ရဲ့ မီးသတ်တပ်ဖွဲ့မှ မီးသတ်ကား၊ တအာင်းပြည် ပညာရေးကောင်စီ- TLEC ရဲ့ ကျောင်းသူကျောင်းသား၊ ရွာခံလူထုနဲ့အတူ ဝိုင်းဝန်းငြိမ်းသတ်ပေးခဲ့ကြောင်း PSLF/TNLA ရဲ့ သတင်းနဲ့ ပြန်ကြားရေးဌာနရဲ့ သတင်းထုတ်ပြန်ချက်ထဲ ဖော်ပြထားပါတယ်။
