လွေးလာဝ်ဇာရ်၊ ဖေဖော်ဝါရီ ၂ ရက်၊ ဘုတလင်
စစ်ကိုင်းတိုင်း ဘုတလင်မြို့နယ်မှာ စစ်ကောင်စီတပ်က ဒရုန်းနဲ့ ဗုံးကြဲမှုကြောင့် စိမ့်တော၊ တောရ ဘုန်းကြီးကျောင်းရဲ့ ကျောင်းထိုင်ဆရာတော် ဦးက္ကဒ္ဓိဗလ ပျံလွန်တော်မူသွားတယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၁ ရက် ညနေ ၅ နာရီမှာ ဖြစ်ပွားခဲ့တာဖြစ်ပြီး ဒရုန်းနဲ့ ၂ ကြိမ် လာရောက် ကြဲချခဲ့ပြီး နောက်ဆုံးအလုံးက ကျောင်းဝန်းထဲ ကျရောင်ပေါက်ကွဲပြီးတော့ သက်တော် ၅၀ နှစ်ရှိပြီဖြစ်တဲ့ ကျောင်းထိုင်ဆရာတော် ပျံလွန်တော်မူသွားခဲ့ပါတယ်။
ဒေသခံ အမျိုးသားတစ်ဦးက “ဒရုန်းနဲ့ နှစ်ကြိမ် လာပစ်တယ်။ ပထမတစ်ခါက တောထဲမှာဘဲ ကျတာ။ နောက်ဆုံးကျတော့ ကျောင်းဝန်းထဲ ကျတာ။ ကျောင်းထိုင် ဆရာတော်ကိုထိပြီး ပျံလွန်တော်မူသွားတယ်။ တော်သေးလို့ ကျောင်းမှာ ဆရာတော်တစ်ပါးဘဲရှိတာ” လို့ ပြောပါတယ်။
စစ်တပ် ဒရုန်းနဲ့ ပစ်လိုက်တဲ့ကျောင်းဟာ ဘုတလင်မြို့ အနောက်ဘက်ခြမ်းရဲ့ တစ်မိုင်ခွဲအကွာမှာရှိတဲ့ စိမ့်တော တောရ ဘုန်းကြီးကျောင်း ဖြစ်ပါတယ်။
ဘုတလင်မြို့ အနောက်ဘက်ခြမ်းမှာ စစ်တပ်က မကြာခဏ စစ်ကြောင်းထိုးပြီး လေကြောင်းသုံး တိုက်ခိုက်မှု ပြုလုပ်တဲ့အပြင် ဒရုန်းဗုံးနဲ့ပါ ကြဲချတာ မကြာခဏ လုပ်ဆောင်နေတယ်လို့ ၎င်းက ပြောပါတယ်။
