ယာရူစိင်း၊ ဇန်နဝါရီ ၂၄ ရက်၊ တန့်ယန်း
စစ်ကောင်စီတပ် ထိန်းချုပ်ထားတဲ့ ရှမ်းမြောက် တန့်ယန်းမြို့မှာ ရွှေဆိုင်တစ်ဆိုင် ဓားပြ တိုက်ခံရပြီး တစ်ပတ်အတွင်း ဓားပြတိုက်မှု ၃ ကြိမ်ထက်မနည်း ဖြစ်ပွားခဲ့ကြောင်း ဒေသခံတွေရဲ့ ပြောပြချက်အရ သိရပါတယ်။
မနေ့ ဇန်နဝါရီ ၂၃ ရက် နေ့လယ်ပိုင်းမှာ တန့်ယန်းမြို့ ရပ်ကွက်(၄)ရှိ မြို့မဈေးထဲက ရွှေဆိုင်တစ်ဆိုင်ကို သေနတ် ကိုင်ဆောင်ထားတဲ့ လူတစ်စုက ကားနဲ့ လာရောက်ကာ ဓားပြတိုက်သွားတယ်လို့ တန့်ယန်းမြို့ခံ အမျိုးသမီးတစ်ဦးက ရွှေဖီမြေကို ပြောပါတယ်။
“အဲဓားပြတွေက သေနတ် ပါတယ်။ ဆိုင်ပိုင်ရှင်ကို သူတို့က လည်ပင်း ညှစ်ပြီး သေနတ် ထောက်တယ်။ ပြီးကျ ရှိသမျှ ရွှေတွေ အကုန်ယူသွားတာ အများကြီး ပါသွားတယ်။ အဲဒီနားမှာကျ လူတွေအများကြီးပါ လူပျက်တဲ့အချိန်ဆိုရင် ရှားတယ်”
ဓားပြတိုက်သူတွေ ယူဆောင်သွားတဲ့ ရွှေတွေရဲ့တန်ဖိုး အသေးစိတ် မသိရသေးဘဲ ဓားပြအဖွဲ့ထဲက အမျိုးသားတစ်ဦးကိုတော့ ဘေးပတ်ဝန်းကျင်မှာရှိတဲ့ လူထုတွေက ဝိုင်းဝန်းဖမ်းဆီးရမိခဲ့တယ်လို့ ၎င်းက ဆက်ပြောပါတယ်။
နောက်ထပ် ဒေသခံ အမျိုးသားတစ်ဦးကလည်း “ပြီးခဲ့တဲ့ ၁၉ ရက်ကလည်း ဓားပြတိုက်မှု ဖြစ်သေးတယ်။ ဒါပေမဲ့ ဆိုင်ပိုင်ရှင်က ဒီအတိုင်းဘဲ ထားလိုက်တာ။ ဘာမှ တိုင်ကြားတာ မရှိဘူး။ ဒီရက်ပိုင်းမှာ ဓားပြတိုက်မှု မကြာခဏ ဖြစ်ပွားနေတယ်ဗျ။ အသွားအလာလည်း မလုံခြုံတော့ပါဘူးဗျ။ တော်တော် ဆိုးဆိုးဝါးဝါး ဖြစ်နေပါတယ်” ဆိုပြီး ပြောပါတယ်။
တန့်ယန်းမြို့ထဲ ကျားဖြန် လုပ်ကိုင်သူတွေ ရောက်လာပြီးနောက် စားသောက်ကုန်နဲ့ အိမ်ခန်းငှားခ အဆမတန် ဈေးတက်လာပြီး တရားဥပဒေစိုးမိုးရေးလည်း အားနည်းနေကြောင်း ဒေသခံတွေက ရွှေဖီမြေသို့ ပြောဆိုထားဖူးပါတယ်။
